Hashim Rungwe akwama kortini, fidia ya Sh1 bilioni yayeyuka

Kigoma. Hashim Rungwe, mwenyekiti wa Taifa wa Chama cha Ukombozi wa Umma (Chaumma), amekwama mahakamani baada ya madai yake ya kulipwa fidia ya Sh1 bilioni kukataliwa na mahakama ikatamka yeye si mmiliki halali wa kiwanja alichokuwa anadai.

Rungwe ambaye katika hukumu hiyo mahakama imemtambua pia kwa jina lake maarufu la Sipunda, ni wakili wa kujitegemea.

Katika hukumu yake, Jaji John Nkwabi wa Mahakama Kuu, Masjala Ndogo ya Kigoma, amesema kiwanja namba 153/B alichokuwa anadai Rungwe hakipo, bali eneo lote lenye futi za mraba 22,610 ni mali ya Zubeda Lakha.

Rungwe katika kesi hiyo ya ardhi namba 000018707 ya 2025, alimshitaki Lakha, Albert Sitta Memo Auction Mart, Bera Karumba, Kamishna wa Ardhi, Msajili wa Hati, Baraza la Halmashauri ya Ujiji na Mwanasheria Mkuu wa Serikali (AG).

Jaji alianza hukumu yake kwa kusema ingawa inaonekana kuwa ya ajabu kama ilivyodaiwa na Rungwe, kiwanja namba 153 Kitalu A, kilichopo kando ya Barabara ya Lumumba katika Manispaa ya Kigoma/Ujiji, kiligawanywa katika viwanja vitatu.

Mojawapo ya vipande vilivyotokana na mgawanyo huo (Kiwanja namba 153/B), kilidaiwa kuwa ni mali ya mdai (Rungwe) na ndicho kiini cha shauri hilo.

“Hayo yote ni licha ya ukweli usemao, waongo lazima wawe na kumbukumbu nzuri. Methali nyingine ambayo inaonekana kusahaulika na mdai ni ile isemayo: “Usidhani kuwa hakuna mamba kwa sababu maji yametulia,” alisema Jaji.

Kiini cha mgogoro

Katika ufafanuzi wa kiini cha mgogoro, Jaji amesema sehemu nyingine zinazodaiwa kuwa za mgawanyo huo ambazo ni kiwanja namba 153 A na 153 C hazina mgogoro wowote; hivyo zinaendelea kuwa chini ya umiliki halali wa mdaiwa wa kwanza, Lakha.

Viwanja hivyo vingine havikuwa na pingamizi, vilikuwa kiini cha shauri lingine lililohitimishwa kwa ushindi wa Lakha, katika Mahakama ya Rufani ya Tanzania.

Hii ni katika kesi iliyojulikana kama Zubeda Ahmed Lakha dhidi ya Hajibhai Kara Ibrahim na wengine, Rufani ya shauri la madai namba 238 ya 2018 iliyotolewa hukumu Mei 25, 2022 kama ilivyo Kielelezo D2.

Katika shauri hilo, Zubeda Lakha alikuwa amemshtaki Hajibhai Kara Ibrahim, Waziri wa Ardhi, Maliasili na Utalii, pamoja na Mwanasheria Mkuu wa Serikali.

Mahakama ya Rufani ilimtangaza Lakha kama mmiliki halali wa kiwanja namba 153 kitalu A, Lumumba A na kwamba kubatilishwa kwa hati yake pamoja na mgawanyo uliofanyika (viwanja vitatu) ulikuwa ni batili.

Kuhusu kiwanja kilichodaiwa kugawanywa na kupata kipande namba 153/B, inadaiwa kuwa kilinunuliwa na mdaiwa wa tatu, Bera Kirumba, kutoka kwa Mohamedaffic Ladhu Jaffer mwaka 1993.

Inadaiwa Mohamedaffic Ladhu Jaffer alimiliki kipande hicho cha ardhi kuanzia Januari 22, 1981 baadaye akadaiwa kukiuza kwa Bera Kirumba, ambaye pia alikiuza kwa Rungwe.

Kwa mujibu wa mdai (Rungwe), alishtushwa na notisi ya kufukuzwa iliyotolewa kwake na Mdaiwa namba 2 (dalali), ambaye alikuwa akitekeleza maelekezo ya Mahakama katika hatua za utekelezaji wa hukumu ya Mahakama ya Rufaa ambayo ilimtaja Lakha kuwa mmiliki halali wa eneo hilo lote.

Hata hivyo, Rungwe alikiri kwamba hakuwa amebadilisha umiliki kutoka kwa Bera Kirumba kwenda kwake, lakini akasisitiza kuwa: “Ninadai kiwanja namba 153/B na si kiwanja kingine chochote.”

Katika maswali ya nyongeza (reexamination) , alisema alibaini kiwanja chake, ambacho ni namba 153/B, hakikutajwa katika uamuzi wa Mahakama ya Rufani.

Lakini kwenye kesi hiyo, Lakha alisisitiza kuwa yeye ndiye mmiliki wa kiwanja namba 153 kilichopo Barabara ya Lumumba, katika Manispaa ya Kigoma, tangu mwaka 1971 alipokinunua kutoka kwa Noorallah Gulamhusein Rajpar Ladak kwa Sh36.

Kisha alihamishia hati ya umiliki yenye namba 6793 kwa jina lake; hati hiyo inahusu eneo lenye ukubwa wa futi za mraba 22,610.

Baadaye aligundua kuwa kiwanja hicho hakikuwa kimesajiliwa kwa jina lake, hivyo akafungua shauri ambalo alishinda katika Mahakama ya Rufani, kama ilivyoelezwa awali na Jaji Nkwabi mwanzoni mwa hukumu yake.

Aliyemuuzia Rungwe

Katika ushahidi wake, Bera Kirumba alisema aliuza kiwanja hicho kwa Rungwe baada ya yeye kukinunua kutoka kwa Mohamedaffic Ladhu Jaffer, ambaye alikuwa na ofa ya haki ya kumiliki ardhi.

Katika hatua ya kuulizwa maswali na upande wa pili, Bera alikiri kuwa nyuma ya kielelezo D.1 hakuna jina la Hashim Rungwe.

Pia, alikiri kuwa katika nyaraka za uhamisho kutoka kwa Jaffer kwenda kwake (kielelezo P.2), hakuna jina la Bera Kirumba na kisha akatoa kauli ya kukiri ambayo ilikuwa na madhara makubwa kwake wakati akihojiwa.

“Nilimuuza Hashim Rungwe kiwanja hicho wakati ofa ya haki ya kumiliki ardhi haikuwa imehamishiwa kwangu. Sijawasilisha risiti yoyote ya malipo niliyofanya kuhusiana na kiwanja hicho,”alisema Jaji akinukuu ushahidi wa Bera.

Alipoulizwa na Mahakama ili kupata ufafanuzi, shahidi huyo alisema kwamba ikiwa alitapeliwa, basi waliomtapeli ni maofisa wa ardhi, kwa kumfanya anunue ardhi kutoka kwa Mohamedaffic Ladhu Jaffer.

Maofisa Ardhi waliotoa ushahidi walithibitisha eneo hilo ni mali ya Lakha.

Hukumu ya Jaji

Katika hukumu yake aliyoitoa Oktoba 19,2026, Jaji Nkwabi alianza na hoja ya kwanza, ambayo ilikuwa ni kubaini kama kiwanja namba 153/B na Kiwanja namba 153/2 ni kilekile, kando ya Barabara ya Lumumba Kigoma/Ujiji.

“Katika shauri hili, ni wazi kuwa mdaiwa wa kwanza ndiye mmiliki wa kiwanja kinachozungumziwa, kwa mujibu wa kielelezo D2; ambapo, kwa mujibu wa upande wa utetezi, umiliki huo unatokana na matakwa ya sheria.

“Hivyo basi, ikiwa mdai ana mashaka kuhusu uhalali wa hati ya umiliki ya mdaiwa wa kwanza kutokana na maswali yanayohusu uraia, anaweza kushughulikia suala hilo kwa kuwasilisha maombi ya mapitio katika Mahakama ya Rufaa”

“Haipaswi kuleta malalamiko hayo kupitia shauri hili katika mahakama hii, kwani sina mamlaka ya kuchunguza na kutoa uamuzi juu ya jambo lolote ambalo tayari limeamuliwa na Mahakama ya Rufaa,” alisema Jaji.

“Kulingana na mjadala uliotangulia, nimeamua kuwa hakuna viwanja namba 153/B wala namba 153/2, kwani vyote ni vya kubuni.

Jaji akaongeza kusema: “Ninachoweza kusema katika kujibu hoja hii ni kwamba kiwanja kinachozungumziwa ni sehemu ya kiwanja namba 153, Kitalu A, kilichopo Barabara ya Lumumba katika Manispaa ya Kigoma/Ujiji.

Jaji akasema kutokana na mjadala huohuo, hoja ya kama mdaiwa wa tatu alikuwa na haki miliki ya kumhamishia Rungwe kuhusu kiwanja namba 153/B, jambo ambalo lingemfanya mdai (Rungwe) kuwa mmiliki halali, si kweli.

“Ili kuweka mambo wazi, mdaiwa wa tatu (Bera Karumba) hakuwa na haki miliki yoyote ya kumhamishia mdai (Rungwe). Kwa hakika, kiwanja hicho kinachodaiwa kuwa ni namba 153/B hakipo kabisa,” alisisitiza Jaji.

“Kuhusu hoja kama mdai alipata hasara kutokana na matendo ya wadaiwa, tayari nimeamua kuwa mdai ameshindwa kuthibitisha umiliki wa kiwanja kinachozungumziwa. Nimeamua kwa faida ya mdaiwa wa kwanza.

“Kwa msingi huo, mdai ameshindwa kuthibitisha kuwa alipata hasara kutokana na matendo ya wadaiwa katika kesi hii. Hivyo, jibu la hoja hii ni hasi.

Katika maombi hayo, Rungwe alikuwa pamoja na mambo mengine, anaiomba mahakama itamke kuwa mdaiwa wa kwanza, Lakha si raia wa Jamhuri ya Muungano wa Tanzania na hastahili kumiliki ardhi.

Lakini pia kwamba Mahakama iwaamuru wadaiwa wote wamlipe Sh1 bilioni, kiasi ambacho kitatathminiwa na Mahakama, ikiwa ni fidia kwa ajili ya mateso usumbufu aliopata kutokana na kitendo cha wadaiwa wa kwanza na wa pili kuingia kinyume cha sheria katika ardhi inayogombaniwa.

Source link

October 21, 2026