Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Mahakama yapokea ushahidi mpya kuhusu mwenyekiti wa Bavicha kushikiliwa

4 mins read

Mahakama yapokea ushahidi mpya kuhusu mwenyekiti wa Bavicha kushikiliwa

Habari za Dharura

October 30, 2026 Admin0

Dar es Salaam. Mahakama Kuu ya Tanzania, Masjala Ndogo ya Dar es Salaam, imekubali kupokea kiapo cha ziada katika shauri linalohusu madai ya kushikiliwa kwa Mwenyekiti wa Baraza la Vijana wa Chadema (Bavicha) Mkoa wa Kigoma, Colletha Ntidyicha.

Mahakama hiyo, chini ya Jaji Arnold Kirekiano, imekubali ombi la mawakili wa Colletha kuwasilisha kiapo hicho baada ya kusema wamepata taarifa mpya kuhusu mahali anapodaiwa kushikiliwa mteja wao.

Katika uamuzi mwingine, mahakama imetupilia mbali pingamizi la awali lililowasilishwa na wajibu maombi, waliotaka shauri hilo litupiliwe mbali kwa madai ya kasoro za kisheria katika kiapo kilichowasilishwa kuunga mkono maombi hayo.

Colletha amefungua shauri hilo kupitia mawakili wake, akiiomba mahakama iwaamuru wajibu maombi wamwachie huru au wamfikishe mahakamani, kwa mujibu wa utaratibu wa kisheria.

Wajibu maombi katika shauri hilo ni Mkuu wa Kituo cha Polisi Chang’ombe (OCS), Mkuu wa Upelelezi wa Mkoa wa Temeke (RCO), Mkuu wa Upelelezi wa Kanda Maalumu ya Dar es Salaam (ZCO), Mkuu wa Jeshi la Polisi nchini (IGP), Mkurugenzi wa Mashtaka (DPP) na Mwanasheria Mkuu wa Serikali (AG).

Kwa mujibu wa maombi hayo, Colletha alichukuliwa nyumbani kwake, eneo la Kwa Azizi Ally, Temeke, Dar es Salaam, Oktoba 14, 2026, na watu waliojitambulisha kuwa maofisa wa Jeshi la Polisi. Hata hivyo, kwa mujibu wa madai yaliyowasilishwa kortini, hakuwa amefikishwa mahakamani hadi wakati wa kufunguliwa kwa shauri hilo. Oktoba 20, 2026, mawakili wake waliwasilisha maombi ya dharura wakitaka mahakama iamuru aachiliwe huru kutoka katika kile walichokitaja kuwa kizuizi kisicho halali, au wajibu maombi waeleze sababu za kuendelea kumshikilia bila kumfikisha mahakamani kwa mashtaka ya jinai.

Katika shauri hilo la maombi mchanganyiko ya jinai namba 23889/2026, wajibu maombi waliwasilisha pingamizi la awali wakipinga uhalali wa kiapo kilichounga mkono maombi hayo.

Pingamizi la kiapo

Pingamizi hilo, lililosikilizwa Oktoba 28, 2026, lilihusu madai kwamba kiapo hicho hakikuthibitishwa ipasavyo na Kamishna wa viapo, kinyume na matakwa ya sheria.

Wakili wa Serikali Mkuu, Job Mrema, alidai jina ‘David M. Kahyolo’, lililoandikwa kwenye hati ya kiapo kuonyesha aliyekithibitisha, halionekani katika orodha ya mawakili inayopatikana kwenye mfumo wa kielektroniki wa e-Wakili.

Kwa msingi huo, alidai kuwa hati hiyo haikukidhi matakwa ya kifungu cha 8 cha Sheria ya Notari wa Umma na Makamishna wa Viapo, Sura ya 12, Toleo lililorekebishwa mwaka 2023.

Akijibu pingamizi hilo, wakili wa mwombaji, Jebra Kambole, akishirikiana na Deogratius Mahinyila, alidai hoja zilizowasilishwa zinahitaji uchunguzi wa ukweli ulio nje ya nyaraka zilizopo mbele ya mahakama. Kwa hiyo, alisema, hazikukidhi vigezo vya pingamizi la awali linalopaswa kuhusisha hoja ya kisheria pekee.

Mawakili hao pia walieleza kuwa matumizi ya herufi za mwanzo za jina katika ‘David M. Kahyolo’, badala ya jina kamili ‘David Mathias Kahyolo’ lililo kwenye mhuri wa hati hiyo, hayakuwa na uzito wa kutosha kubatilisha uhalali wa kiapo.

Walidai kuwa kasoro hiyo inaweza kurekebishwa kwa kuzingatia kanuni ya lengo kuu la utoaji haki (overriding objective), inayotajwa katika Ibara ya 107A(1) na (2) ya Katiba ya Tanzania na kifungu cha 5 cha Sheria ya Mwenendo wa Mashauri ya Jinai (CPA).

Hata hivyo, Mrema alisisitiza kuwa pingamizi hilo lilihusu hoja ya kisheria pekee na kwamba mahakama haingeweza kurekebisha au kuthibitisha utambulisho wa mtu kwa kubadilisha jina lililoandikwa kwenye hati.

Mahakama yatupilia mbali pingamizi

Katika uamuzi wake, Jaji Kirekiano alisema kuwa kwenye orodha ya mawakili, majina yao huainishwa pamoja na namba zao za usajili.

Alieleza kuwa suala la iwapo David M. Kahyolo ni Kamishna wa Viapo haliwezi kuamuliwa kwa kutegemea kumbukumbu zilizopo mbele ya mahakama pekee.

“Kwa heshima, sikuweza kukubaliana na hoja ya Bw. Mrema kwamba alikagua hifadhidata ya e-Wakili na hakulipata jina hilo miongoni mwa walioorodheshwa kama Makamishna wa Viapo,” alisema Jaji Kirekiano.

Alifafanua kuwa hoja hiyo ilihitaji ushahidi kutoka nje ya kumbukumbu zilizowasilishwa mahakamani, jambo ambalo lingekiuka kanuni za uamuzi wa pingamizi la awali.

Jaji huyo alisema kutaja vifungu vya sheria katika pingamizi hakumaanishi moja kwa moja kuwa pingamizi hilo linahusu hoja ya kisheria pekee, kwa kuwa wakati mwingine huhitaji uchunguzi wa ukweli.

“Baada ya kutafakari suala hili na hoja zilizowasilishwa na pande zote, nimebaini kwamba suala hili linahusisha hitaji la kuchunguza ukweli ili kubaini iwapo madai ya kutokuzingatiwa kwa matakwa ya sheria yanaweza kuthibitishwa,” alisema.

Aliongeza: “Katika mazingira ya shauri hili, pingamizi lililowasilishwa na kujadiliwa halihusu hoja ya kisheria pekee. Kwa hiyo, pingamizi hilo linatupiliwa mbali.”

Kiapo cha ziada kuwasilishwa

Baada ya mahakama kutupilia mbali pingamizi hilo, mawakili wa Colletha waliomba ruhusa ya kuwasilisha kiapo cha ziada, wakieleza kuwa walikuwa wamepata taarifa mpya kuhusu mahali mteja wao anapodaiwa kushikiliwa tangu walipofungua shauri hilo.

Mahakama ilikubali ombi hilo na kuelekeza kiapo hicho kiwasilishwe Oktoba 28, 2026, huku wajibu maombi wakitakiwa kuwasilisha majibu yao leo, Alhamisi, Oktoba 29, 2026.

Jaji Kirekiano alipanga shauri hilo kusikilizwa kesho Ijumaa, Oktoba 30, 2026.

Post navigation

Previous: Zanzibar explores sea-based foods to improve schoolchildren’s nutrition

Next: Zanzibar to link identity card with land ownership records to curb disputes

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Moto wateketeza vyumba 10 vya nyumba Arusha

3 mins read

Moto wateketeza vyumba 10 vya nyumba Arusha

Habari za Dharura

October 31, 2026 Admin0

Zanzibar raises private sector minimum wage, orders contracts for all workers

2 mins read

Zanzibar raises private sector minimum wage, orders contracts for all workers

Habari za Dharura

October 31, 2026 Admin0

Tanzania opens energy sector to more private investment

3 mins read

Tanzania opens energy sector to more private investment

Habari za Dharura

October 31, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.