Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Serikali yaonya kuhusu dhana ya utajiri wa haraka soko la hisa

4 mins read

Serikali yaonya kuhusu dhana ya utajiri wa haraka soko la hisa

Habari za Dharura

October 26, 2026 Admin0

Dar es Salaam. Serikali imewataka wadau wa soko la mitaji nchini kuepuka kuwajengea Watanzania dhana kuwa uwekezaji katika soko la hisa ni njia ya kupata utajiri wa haraka, ikionya kuwa mtazamo huo unaweza kupotosha wawekezaji na kuwaweka katika hatari ya kupoteza fedha zao.

Badala yake, imesisitiza umuhimu wa kutoa elimu itakayowawezesha wananchi kuelewa fursa, gharama, hatari na muda unaohitajika katika uwekezaji ili wafanye maamuzi yanayozingatia uwezo na malengo yao ya kifedha.

Kauli hiyo imetolewa leo Jumatatu, Oktoba 26, 2026 na Waziri wa Nchi, Ofisi ya Rais, Maendeleo ya Vijana, Joel Nanauka wakati wa fainali za mashindano ya DSE Scholar Investment Challenge 2025/26, yaliyoandaliwa na Soko la Hisa la Dar es Salaam (DSE) kwa lengo la kuwajengea wanafunzi uelewa wa masuala ya fedha na uwekezaji.

Nanauka amesema wakati soko la mitaji likiendelea kukua na kuvutia wawekezaji wapya, ni muhimu kuhakikisha wananchi hawaingii katika uwekezaji wakitarajia faida kubwa ndani ya muda mfupi bila kuelewa hatari zake.

Amesema matumizi ya lugha zinazohamasisha utajiri wa haraka yanaweza kupunguza imani ya wananchi kwa soko la mitaji pale matarajio yao yanaposhindwa kutimia.

“Ningetoa tahadhari ya kuepusha lugha ya kuonesha kuna utajiri wa haraka haraka sana kwenye uwekezaji, kwani huwa inaondoa uaminifu. Tunatamani watu wawekeze, lakini kiuhalisia kuna hatari zinazoambatana na uwekezaji,” amesema.

Waziri wa Nchi, Ofisi ya Rais, Maendeleo ya Vijana, Joel Nanauka akikabidhi zawadi kwa mshindi wa kwanza wa mashindano ya DSE Scholar Investment Challenge 2025/26, Innocent Nyika mwanafunzi wa Chuo cha Takwimu cha Afrika ya Mashariki baada ya kuwashinda wenzake tisa. Mashindano hayo yaliandaliwa na Soko la Hisa la Dar es Salaam (DSE).

Amesema uwekezaji unahitaji maarifa, nidhamu, uvumilivu na mtazamo wa muda mrefu badala ya kutegemea bahati au matarajio ya kupata fedha nyingi kwa muda mfupi.

Ameongeza kuwa baadhi ya changamoto zinazowakabili vijana katika uamuzi wa kifedha ni ukosefu wa taarifa za kutosha, kutaka mafanikio ya haraka na kushindwa kuchambua kwa kina fursa zinazojitokeza.

Nanauka amesema hali hiyo inaweza kuwafanya wananchi kuingia katika shughuli za kifedha bila kuelewa namna zinavyofanya kazi, hivyo kuhatarisha fedha zao kwa kutapeliwa au kufanya uwekezaji usioendana na malengo yao.

“Katika eneo la fedha, watu wengi wanapenda mafanikio ya haraka kuliko maeneo mengine. Tunahitaji kuwafanya waelewe kwamba uwekezaji unahitaji ufahamu, elimu na ujuzi, si suala la bahati nasibu,” amesema.

Amesisitiza umuhimu wa vijana kujenga utamaduni wa kuweka akiba, kupanga matumizi na kutumia taarifa sahihi kutoka kwa wataalamu wanaotambulika kufanya maamuzi ya kifedha.

Pia, amesema kuna haja ya kubadili matumizi ya teknolojia miongoni mwa vijana kwa kuelekeza sehemu ya fedha na muda wanaotumia katika shughuli zisizojenga mitaji kwenye uwekezaji na uzalishaji.

Akitoa mfano wa michezo ya kubahatisha kupitia simu za mkononi, amesema uwezo wa vijana kufanya miamala ya kidijitali unaweza kutumiwa kuongeza ushiriki wao katika soko la hisa.

“Kama watu wanaweza kutumia simu zao kufanya betting, wanaweza pia kutumia simu hizo kufanya miamala katika soko la hisa. Tunahitaji kuhamisha nguvu kutoka eneo moja kwenda jingine,” amesema.

Amesema Serikali itaendelea kushirikiana na DSE na taasisi za elimu kuhakikisha maarifa ya fedha na uwekezaji yanawafikia vijana kuanzia shuleni hadi vyuoni.

Ofisa Mkuu wa Maendeleo ya Biashara wa DSE, Emmanuel Nyalali amesema thamani ya miamala ya hisa katika robo ya tatu ya mwaka 2026 ilifikia Sh824.8 bilioni, ikilinganishwa na Sh248.64 bilioni katika kipindi kama hicho mwaka 2023, sawa na ongezeko la takribani asilimia 231.7.

Amesema mtaji wa jumla wa soko ulifikia Sh40 trilioni hadi Septemba 30, 2026, huku DSE ikiendelea kuwekeza katika mifumo ya kidijitali, ikiwamo Hisa Kiganjani, kurahisisha upatikanaji wa huduma.

Hata hivyo, amesema kuongeza wawekezaji pekee hakutoshi bila kuwajengea uelewa kuhusu bidhaa wanazochagua na hatari zake.

Akizungumzia mashindano hayo, Nyalali amesema msimu wa 2025/26 ulishirikisha wanafunzi 7,883, idadi iliyokuwa chini kidogo ya lengo la washiriki 8,000.

Amesema mashindano hayo huwasaidia wanafunzi kujifunza kuchambua kampuni, kutathmini mwenendo wa soko, kupima hatari na kufanya uamuzi kwa kutumia taarifa sahihi.

Mshindi wa kwanza, Innocent Nyika, mwanafunzi wa Chuo cha Takwimu cha Afrika Mashariki, amesema ushindi huo una maana kubwa katika kuanza safari yake ya uwekezaji, akieleza kuwa amejifunza namna ya kujiandaa kifedha kwa maisha yake ya baadaye.

Post navigation

Previous: Kamera za kisasa kudhibiti ukatili watoto majumbani

Next: Dodoma yakabiliwa na upungufu wa maji lita milioni 68 kwa siku

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Ulemavu, ukata wakwamisha ndoto ya James kuendelea na elimu ya juu

6 mins read

Ulemavu, ukata wakwamisha ndoto ya James kuendelea na elimu ya juu

Habari za Dharura

October 26, 2026 Admin0

Mangapwani kuwa kitovu cha mapato ya forodha

2 mins read

Mangapwani kuwa kitovu cha mapato ya forodha

Habari za Dharura

October 26, 2026 Admin0

Waziri Ulega awataka watendaji kutumia madaraka kwa uadilifu

3 mins read

Waziri Ulega awataka watendaji kutumia madaraka kwa uadilifu

Habari za Dharura

October 26, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.