Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

KONA YA MALOTO: Ladha ya undugu wa Kitanzania inapotea kwa kasi

5 mins read

KONA YA MALOTO: Ladha ya undugu wa Kitanzania inapotea kwa kasi

Habari za Dharura

October 28, 2026 Admin0

Ipo taarifa kwenye mitandao ya kijamii na vyombo vya habari vya Kenya na kimataifa, inayoeleza kuchukuliwa na watu wasiojulikana, mwanaharakati na mwanachama wa Chadema, Twaha Mwaipaya. Tukio hilo lilitokea eneo la Kamulu, Nairobi, Kenya.

Twaha ni Mtanzania. Ubalozi wa Tanzania nchini Kenya umeeleza kutokuwa na taarifa rasmi ya tukio hilo. Serikali ya Kenya nayo imetoa taarifa inayofanana na Ubalozi wa Tanzania. Wanaharakati na wanasiasa wa upinzani wa Kenya na Tanzania, wanapiga kelele kushinikiza Twaha apatikane akiwa hai.

Utekaji nyara watu ni jambo baya mno. Kama nchi, kitendo cha Twaha kunyakuliwa Nairobi na watu wasiojulikana, kinapaswa kuwaunganisha Watanzania. Jambo lolote linalohusu haki ya kuishi ya Mtanzania, linapaswa kuwaleta pamoja Watanzania wote.

Kinyume chake, kutekwa kwa Twaha, kama ambavyo inadhaniwa kulingana na taarifa zilizopo hadi sasa, limekuwa jambo linaloibua hasira, chuki, hadi matusi kwa upande mmoja. Wengine, ambao ni Watanzania kama Twaha, wapo kwenye sherehe. Nimeona ‘posti’ za watu wakisherehekea kinachodaiwa kumpata Twaha.

Swali kwamba kwa nini Tanzania imefika hapo, linajibiwa na neno moja tu, chuki! Watanzania wameruhusu chuki iwaongoze katika kujadili na kujenga muktadha wa namna ya kutatua matatizo yao. Mitazamo ya Uzanzibari na Utanganyika, uhasama wa kisiasa, hadi udini.

Hali ikiwa hivyo, wazee ambao kwa uzoefu wao wa utumishi kwenye nchi wanapaswa kutambuliwa kama statesmen, wamechagua upande badala ya kukaa katikati kusuluhisha migogoro. Hivyo, kuzidi kukuza chuki na kujenga mgawanyiko miongoni mwa Watanzania. Ladha ya undugu wa Kitanzania imepoteza.

Mwenye kuipenda Tanzania lazima awaze kuhusu misingi ya chuki ambayo taifa linarithishwa kwa kizazi kipya. Kinachotokea kitandaoni ni chembe ya kile kinachoingia kwenye vichwa na kuzama ndani ya vifua vya watu, hivyo kuchochea roho ya uadui, kuanzia ndani ya familia, jamii wanazoishi hadi mitaa wanayotokea.

Mazungumzo ya kwenye meza ya chakula, mtu na watoto wake yanakuwaje ikiwa mzazi mitandaoni anazungumza chuki, mgawanyiko na kukuza uhasama? Majadiliano yake na wanajamii wenzake yapoje kama mitandaoni anafurahia matatizo ambayo Watanzania wenzake wanayapata?

Mitandao ya kijamii imekuwa ikitumika kama visasi baina ya Watanzania. Mathalan, wapo watu akifariki dunia mtu ambaye anatambulika kuwa upande fulani, wengine wanashereheka. Haya mambo yapo wazi. Wazee walioiishi Tanzania kwa miaka mingi na kushiriki kuijenga, hawapaswi kuwa kimya. Wameamua kuruhusu hayo yaendelee.

Hali ya chuki na magwanyiko inafahamika. Kumeshakuwepo na wito kuhusu maridhiano ili kuirejesha nchi pamoja. Upo upande wao hautaki kabisa kusikia hilo, wengine wanatoa masharti ambayo ni kama hayawezekani. Hakuna tafakuri kuhusu ya kuilinda nchi. Roho ya kushinda na kuuangamiza upande mwingine inatawala.

Busara ya kawaida tu, nchi gani ilipambana na kufanikiwa kujenga amani kwa bunduki na uasi usiokwisha? Historia inaonesha kwamba makundi husuguana, damu humwagika, mwisho kabisa waliotwangana huketi mezani kuzungumza ili kutafuta amani. Sasa, kama hatima ya mapigano ni kuketi mezani na kuzungumza, kwa nini mazungumzo hayafanyiki kabla ya kuingia kwenye mapigano?

Wapo Watanzania huitazama Kenya kama mfano wa taifa linalostawi kidemokrasia. Kumbukumbu kubwa ni machafuko ya mwaka 2007 na 2008. Swali ambalo linapaswa kuulizwa ni je, hatima ya Wakenya ilikuwa nini? Jibu ni kwamba yalifanyika mazungumzo ya amani, pande zilizosigana ziliketi na kukubali maridhiano. Tanzania ambayo ni jirani ya Kenya, inakuwaje isitumie busara ya kuwahi mazungumzo ili kuepesha damu kumwagika.

Mchungaji maarufu Kenya na Afrika Mashariki, Ezekiel Odero, mwaka jana aliiusia Tanzania kuzingatia nafasi yake ya kuwa kimbilio la amani Afrika Mashariki. Mchungaji alisema kuwa kitendo cha Tanzania kuwa na makabila mengi bila kuwepo machafuko inawezekana ni nguvu ambayo Mungu ameiweka ili sehemu nyingine pakichafuka watu wakimbilie.

Unaweza kustaajabu, Mchungaji Ezekiel wa Kenya anaona amani ya Tanzania ni tunu na lazima ihubiriwe ili taifa linabaki salama. Alisema: “Mimi naiombea Tanzania ile amani ambayo ipo nayo iendelee. Na nawaomba Watanzania wasiingie kwenye mtengo wa kuichoma nchi yao.”

Wakati huohuo, wapo viongozi wa dini Tanzania, kila uchwao wanakuza mgawanyiko kwa sababu wamechagua upande. Imani yangu inaniambia kwamba kiongozi wa kiroho anapaswa kuwaleta watu pamoja, amani na upendo vitawale kwenye mitaa, miji na taifa ili watu wahudhurie nyumba za ibada na kumwabudu Mungu bila hofu wala wasiwasi.

Natamani kuona kiongozi wa kiroho anasimama na kuitisha maombi ili Mungu asaidie kuondoa chuki na mgawanyiko miongoni mwa Watanzania. Hofu inakuwa kubwa zaidi, pale watumishi wa Mungu wanapokuwa na upande. Inayoumia ni Tanzania, na mateso makubwa ya mavuno ya chuki inayopandwa sasa, yatawaumiza watu wa kizazi kipya na kijacho.

Statesmen (wazee wastaafu wenye ushawishi kwa jamii) na watumishi wa kiroho, wanatakiwa kusimama katikati na kuonya hatari hii inayolikumba taifa. Chuki ni kubwa na inapaswa kuondoka. Mtanzania anapopatwa na madhara inatakiwa Watanzania waamke na wasimame pamoja. Haitakiwi wengine walie, halafu kundi lingine ndani ya nchi lishangilie.

Tabia gani hii ya kushangilia maafa ya wengine? Kilichozalishwa kwenye nyoyo za watu na kusababisha madhara makubwa kwa taifa Oktoba 29, 2025, kinaendelea kuiangamiza nchi. Tanzania inaumizwa na inaumia. Undugu wa Watanzania unapotea. Hakuna ambaye anataka kuwaleta watu katikati.

Naomba kumaliza kwa swali, nchi inapoumia faida inakuwa kwa nani? Yaliyojiri Oktoba 29, 2025 yakijirudia, tena zaidi, au hata nusu yake, mnufaika anakuwa nani? Na manufaa gani sasa kwa gharama ya damu na mali za Watanzania. Statesmen mpo wapi kutimiza wajibu wenu. Mnaona sawa nanyi kutembea na upepo. Viongozi wa dini msiohubiri upatanisho, mna maagano yapi na Mungu mnayemtumikia?

Post navigation

Previous: Tanzania: Zanzibar Records Drop in Maternal, Child Deaths

Next: Sintofahamu Biya kuiongoza Cameroon | Mwananchi

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

3 mins read

Tanzania: No Accountability One Year After Tanzania Election Violence

Habari za Dharura

October 29, 2026 Admin0

1 min read

Tanzania: Kilimanjaro Boxing Bonanza Draws Huge Crowd

Habari za Dharura

October 28, 2026 Admin0

…Kamati yatilia shaka baadhi ya maeneo, yashauri

2 mins read

…Kamati yatilia shaka baadhi ya maeneo, yashauri

Habari za Dharura

October 28, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.