Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Sintofahamu Biya kuiongoza Cameroon | Mwananchi

8 mins read

Sintofahamu Biya kuiongoza Cameroon | Mwananchi

Habari za Dharura

October 28, 2026 Admin0

Maisha na utawala wa Rais wa Cameroon, Paul Biya, mwenye umri wa miaka 93, yamekuwa na mshangao mkubwa duniani kutokana na mtindo wake wa kuiongoza nchi hiyo akiwa nje ya nchi yake kwa muda mrefu.

Mbali na hilo, tangu uchaguzi mkuu ulipofanyika Oktoba mwaka jana, akichaguliwa kwa muhula wa nane, Biya hajaunda baraza lake la mawaziri, jambo ambalo wachambuzi wa siasa wanasema ni ombwe la uongozi katika taifa hilo la Afrika ya Kati.

Mara kadhaa kumekuwa na sintofahamu kuhusu afya yake na wakati mwingine amekuwa akizushiwa kifo, taarifa ambazo serikali yake imekuwa ikizikanusha kila zinapojitokeza licha ya kiongozi huyo kutoonekana hadharani.

Biya, ambaye ndiye rais aliyekaa madarakani kwa muda mrefu zaidi barani Afrika, anafahamika kwa kukaa nje ya nchi anayoiongoza kwa vipindi virefu. Hivi karibuni alirejea nchini baada ya kukaa nje kwa zaidi ya miezi miwili, katika mojawapo ya vipindi vyake virefu zaidi vya kutokuwepo nchini.

Kutokuwepo kwake kwa muda mrefu kulizua tena maswali kuhusu afya yake, huku kukiwa na taarifa ambazo hazijathibitishwa kwamba alikuwa amelazwa hospitalini au hata amefariki dunia.

Licha ya Biya kurejea nchini mwishoni mwa Agosti 2026 baada ya kukaa nje kwa zaidi ya miezi miwili, baadhi ya wananchi bado hawajaridhika.

Likizo yake ya hivi karibuni pia imeibua mjadala nchini Cameroon kuhusu mustakabali wa taifa hilo baada ya utawala wa Biya, huku wanaotajwa kuwa warithi wake wakishindania ushawishi wa kisiasa.

Pia, kuna maswali kuhusu uwezo wake wa kuendelea kuongoza kutokana na kutokuwa na uhakika kuhusu hali yake ya kiafya.

Wananchi wanatarajia serikali mpya kutangazwa hivi karibuni. Ingawa Biya alichaguliwa tena kwa muhula wa nane katika uchaguzi wenye utata uliofanyika Oktoba mwaka jana, bado hajatangaza baraza jipya la mawaziri.

Wengi pia wanatumaini kuwa hatimaye atateuliwa makamu wa rais, ikiwezekana mtu ambaye atakuwa akiishi nchini na kutekeleza majukumu yake akiwa huko.

Biya ni nani?

Biya ameiongoza Cameroon tangu mwaka 1982 kupitia chama cha Cameroon People’s Democratic Movement (RDPC).

Ameongoza kwa muda mrefu zaidi kuliko umri wa maisha wa karibu vijana wote walio chini ya miaka 30 nchini humo. Kundi hilo linaunda asilimia 70 ya wakazi wa Cameroon, ambao wanakadiriwa kufikia milioni 30.

Yeye ndiye kiongozi mwenye umri mkubwa zaidi barani Afrika na ni miongoni mwa viongozi waliokaa madarakani kwa muda mrefu zaidi duniani.

Wakati wa utawala wake, mashambulizi ya kundi lenye silaha la Boko Haram yameendelea katika maeneo ya kaskazini mwa nchi hiyo, huku wapigania kujitenga wakiendelea na shughuli zao katika maeneo ya magharibi.

Licha ya Cameroon kuwa na utajiri wa mafuta, uchumi wake umekuwa ukikua kwa kiwango kidogo kwa muda mrefu.

Wachambuzi wanasema Biya, ambaye mara nyingi huitwa “rais asiyekuwepo nchini”, amekuwa akiachia sehemu kubwa ya majukumu ya utawala kwa baraza lake la mawaziri.

Viongozi wa upinzani wamemtuhumu kuendesha Cameroon kana kwamba nchi hiyo inajiendesha yenyewe bila usimamizi wa karibu wa rais.

Inaaminika kuwa rais huyo hutumia vipindi virefu katika Hoteli ya InterContinental nchini Uswisi.

Kwa mujibu wa uchambuzi uliofanywa na Mradi wa Kuripoti Uhalifu wa Kupangwa na Ufisadi (OCCRP), kufikia mwaka 2018, Biya alikuwa ametumia jumla ya miaka minne na nusu katika ziara binafsi nje ya nchi.

Mke wake, Chantal Biya, anafahamika kwa mtindo wake wa maisha na mavazi yanayovutia hisia za watu.

Uchaguzi wa hivi karibuni uliompa Biya ushindi mwingine ulisababisha maandamano makubwa, ambayo yalizimwa kwa nguvu na vyombo vya usalama. Mashirika ya kutetea haki za binadamu yalisema watu wasiopungua 48 waliuawa.

Kiongozi wa upinzani, Issa Tchiroma Bakary, ambaye alidai kuwa ndiye mshindi wa uchaguzi huo, alilazimika kwenda uhamishoni nchini Gambia.

Tchiroma aliwahi kuwa sehemu ya serikali ya Biya, ambako alishikilia nyadhifa mbalimbali za uwaziri kwa kipindi cha miaka 16.

Pia, aliwahi kuwa msemaji wa serikali wakati nchi hiyo ilipopambana na Boko Haram, akitetea jeshi lilipokabiliwa na tuhuma za kuua raia.

Wakati mmoja alichukuliwa kuwa miongoni mwa wanasiasa wa zamani waliokuwa waaminifu kwa Biya, lakini katika kampeni zake za hivi karibuni aliahidi kuleta “mabadiliko”.

Siku 74 nje ya nchi yake

Biya aliwasili nchini Cameroon Agosti 20 baada ya kukaa nje kwa siku 74, ikiwa ni mojawapo ya vipindi virefu zaidi vya kutokuwepo kwake nchini humo.

Mwaka 2024, alikaa nje ya nchi kwa siku 42.

Rais huyo alikuwa Geneva, Uswisi, tangu Juni 7, kwa kile ofisi yake ilichokiita “ziara fupi ya binafsi”. Kwa mujibu wa vyombo vya habari vya ndani, alifuatana na baadhi ya wanafamilia na wasaidizi wake wa karibu.

Tetesi kuhusu afya yake zilipozidi kushika kasi wakati wa kutokuwepo kwake, maofisa wa serikali walikanusha taarifa kwamba Biya alikuwa amelazwa katika kliniki moja jijini Geneva.

Aliporejea, Biya na mke wake walipokelewa na umati mkubwa wa wafuasi wa chama tawala.

Picha chache za muda mfupi zilionyesha rais akiwapungia mkono watu akiwa ndani ya gari la rais na kusalimiana kwa kupeana mikono na Waziri Mkuu, Joseph Ngute.

Hata hivyo, wananchi wengi hawakuridhishwa na uchache wa video hizo, wakisema hazikutoa ushahidi wa kutosha kuhusu hali ya afya ya rais wao.

Nini kimetokea tangu amerejea?

Hakujakuwa na mabadiliko makubwa tangu rais huyo arejee, jambo ambalo limewakatisha tamaa baadhi ya wananchi.

Tangu achaguliwe tena, hajatangaza baraza jipya la mawaziri wala kumteua makamu wa rais.

Wakati akiwa nje ya nchi, ofisi yake ilitoa amri kadhaa, ikiwamo amri ya kuwapandisha vyeo makanali watano wa jeshi na nyingine iliyopanga upya uhamisho wa maofisa ndani ya jeshi.

Hata hivyo, tangu wakati huo, hali imekuwa tulivu.

Sasa, baadhi ya wananchi wa Cameroon wanataniana kwenye mitandao ya kijamii wakisema huenda rais huyo amekuja kwa ziara tu na hivi karibuni atarejea katika makazi yake nchini Uswisi.

Mtu mmoja alichapisha ujumbe wa mzaha kwenye mitandao ya kijamii wenye kichwa cha habari kinachosema:

“Rais wa Cameroon, Paul Biya, mwenye umri wa miaka 93, anatarajiwa kutembelea Cameroon wiki ijayo kwa ziara ya kikazi ya wiki mbili kabla ya kurejea Geneva, Uswisi, anakoishi.”

Ombwe la uongozi

Wakati Biya akiwa nje ya nchi, chama tawala cha Cameroon kilipuuza wasiwasi wa wapigakura na kusisitiza kuwa hakukuwa na ombwe la kikatiba wala kisiasa.

Hata hivyo, sasa kwa kuwa rais huyo amerejea, haijulikani ana mpango gani wa kuchukua hatua zinazofuata.

Jason Healy, mchambuzi wa hatari za kisiasa katika nchi za Afrika Kusini mwa Jangwa la Sahara, aliwahi kuiambia Al Jazeera kuwa kuchelewesha uteuzi wa mawaziri kunaweza kuwa mkakati wa Biya wa kudumisha udhibiti wake dhidi ya mabadiliko yoyote ya kisiasa.

Hata hivyo, wataalamu wameonya kuwa kudorora kwa shughuli za kisiasa kwa muda mrefu kunaathiri imani ya wawekezaji nchini humo.

Kwa sasa, wananchi wa Cameroon wanatamani kujua nani anaweza kumrithi rais huyo iwapo atashindwa kuendelea na majukumu yake.

Kukaa kwake nje ya nchi kwa muda mrefu kumeongeza mvutano wa kuwania madaraka miongoni mwa wanaotajwa kuwa warithi wake ndani ya chama tawala.

Biya hajawahi kumtangaza rasmi mtu anayemwona kuwa mrithi wake wala kumuandaa mtu yeyote kwa nafasi hiyo, hali inayozidisha kutokuwa na uhakika kuhusu mustakabali wa uongozi wa nchi hiyo.

Sasa, macho yote yanaelekezwa kwa mtu atakayeteuliwa kuwa makamu wa rais.

Nafasi hiyo ilifutwa mwaka 1972, lakini Aprili mwaka huu, Bunge lilirejesha nafasi hiyo katika hatua iliyowashangaza wengi.

Chini ya sheria mpya, rais ana mamlaka ya kumteua na kumwondoa makamu wa rais. Endapo rais atashindwa kuendelea na majukumu yake, makamu huyo atakamilisha kipindi kilichobaki cha muhula wa miaka saba wa rais.

Baadhi ya watu wanaiona sheria hiyo kama jaribio la Biya la kujichagulia mrithi anayempenda. Hata hivyo, vyama vya upinzani vimeikosoa sheria hiyo vikisema si ya kidemokrasia na kwamba kimsingi inazuia wananchi kuchagua kiongozi wao kupitia uchaguzi.

Iwapo nafasi ya makamu wa rais itaendelea kuwa wazi, Rais wa Seneti, Aboubakary Abdoulaye, ndiye atakayekuwa na nafasi ya kuongoza nchi kwa muda hadi uchaguzi utakapofanyika.

Hata hivyo, wachambuzi wamemtaja Katibu Mkuu wa nchi hiyo, Ferdinand Ngoh-Ngoh, anayeaminika kuwa ndiye “rais halisi kwa vitendo”, kama mtu anayeweza kuwa makamu wa rais anayesubiri kuteuliwa.

Pia, kuna mtoto wa Biya, Franck Biya, ambaye huenda akapata uungwaji mkono kutoka kwa wafuasi wa karibu wa baba yake katika maeneo ya kusini na katikati mwa Cameroon.

Hata hivyo, Franck hana uzoefu mkubwa wa kisiasa.

Post navigation

Previous: KONA YA MALOTO: Ladha ya undugu wa Kitanzania inapotea kwa kasi

Next: Imbibers warned against mixing alcohol with caffeinated drinks

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

1 min read

Tanzania: Kilimanjaro Boxing Bonanza Draws Huge Crowd

Habari za Dharura

October 28, 2026 Admin0

…Kamati yatilia shaka baadhi ya maeneo, yashauri

2 mins read

…Kamati yatilia shaka baadhi ya maeneo, yashauri

Habari za Dharura

October 28, 2026 Admin0

Samia ataka jumuiya za kiraia kuimarisha ulinzi wa maadili ya Taifa

4 mins read

Samia ataka jumuiya za kiraia kuimarisha ulinzi wa maadili ya Taifa

Habari za Dharura

October 28, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.