Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Mbinu kubadilisha miundombinu iliyopo ya maji kuwa huduma ya uhakika -3

6 mins read

Mbinu kubadilisha miundombinu iliyopo ya maji kuwa huduma ya uhakika -3

Habari za Dharura

October 28, 2026 Admin0

Dar es Salaam. Kwa baadhi ya wakazi wa Kijiji cha Ishinde, wilayani Same, maji si suala tena la kama chanzo cha maji kipo au la.

Swali kubwa zaidi ni iwapo maji hayo yanaweza kufikishwa karibu na makazi yao kiasi cha kurahisisha maisha ya kila siku.

Katika vitongoji kama Ishinde Stendi, Kigogo na Kisakeni, Serikali imeweka miundombinu ya maji, lakini baadhi ya wakazi wanasema bado hukaa siku kadhaa au hata wiki bila kupata huduma ya maji ya uhakika, isipokuwa Kitongoji cha Kibaoni Igongo ambacho kina huduma ya maji ya uhakika.

Katika Kitongoji cha Morondwe, kisima kirefu kimechimbwa na vifaa vya sola vimefungwa, lakini wakazi bado hutembea kati ya dakika 30 na saa mbili kwenda na kurudi kwenye chanzo hicho wanapokuwa na mwanga wa jua.

Jua linapokosekana, maji pia hukosekana, hali inayowalazimisha baadhi ya wakazi kulipa hadi Sh6,000 kwa usafiri wa pikipiki ili kupeleka maji nyumbani.

Kwa kijiji ambacho kimekabiliwa na uhaba wa maji kwa zaidi ya miaka 17, hali hiyo inaonesha tatizo ambalo sasa linahusu zaidi hatua ya mwisho ya kufikisha huduma.

Ishinde, hatua hiyo ya mwisho si lazima iwe bomba moja ambalo halijawekwa. Kutegemea kitongoji, inaweza kumaanisha uwepo wa matangi ya kuhifadhi maji, mabomba ya kusambaza maji, miunganisho ya kaya, mfumo wa kusukuma maji unaotegemewa au mfumo wa usimamizi wenye uwezo wa kuhakikisha miundombinu inaendelea kufanya kazi.

Ushiriki wa wadau

Ofisa wa Rotary Club Same, ambaye hakutaka jina lake litajwe, ameliambia The Citizen, gazeti dada la Mwananchi, kuwa klabu hiyo iliboresha upatikanaji wa majisafi na ya uhakika katika Kitongoji cha Kigogo kupitia mradi uliogharimu zaidi ya Sh250 milioni.

Mradi huo ulihusisha kuchimba kisima chenye uzalishaji mzuri, kujenga nyumba ya pampu na tangi la kuhifadhi maji lenye mita za ujazo 150 (sawa na lita 150,000), kuweka laini ya umeme yenye urefu wa kilomita moja pamoja na transfoma, pamoja na kulaza mabomba ya kusambaza maji yenye urefu wa zaidi ya mita 4,300.

Awali, maji yalitolewa kupitia vituo vinane vya kuchotea maji vya umma, ambavyo baadaye vilibadilishwa na kuwa miunganisho ya maji majumbani.

Mradi huo pia ulihusisha kujenga birika la kunyweshea mifugo, huku waendeshaji wa eneo hilo na kamati ya usimamizi wakipewa mafunzo ili kuhakikisha mfumo huo unasimamiwa ipasavyo.

Baada ya kukabidhiwa kwa jamii, mfumo huo ulikabidhiwa kwa Mamlaka ya Maji na Usafi wa Mazingira Same-Mwanga (Samwasa) kwa ajili ya kuendelea kuusimamia.

Upatikanaji wa maji ya uhakika uliboresha usafi na mazingira ya maisha, ukawezesha kaya kuanzisha bustani za mboga na kuimarisha upatikanaji wa chakula.

Upatikanaji wa maji kwa mifugo pia uliboresha afya ya wanyama, huku huduma bora ya maji na usafi wa mazingira ikisaidia kupunguza hatari ya magonjwa yanayoenezwa kwa maji na magonjwa mengine ya kuambukiza.

Miundombinu iliyoboreshwa pia ilichangia kuongezeka kwa upatikanaji wa umeme na ujenzi wa nyumba mpya katika kitongoji hicho.

Uzoefu wa Kigogo unaonesha namna uwekezaji katika miundombinu ya maji, ukichanganywa na ushiriki wa jamii na waendeshaji waliopewa mafunzo, unavyoweza kuleta manufaa yanayovuka utoaji wa maji pekee.

Hata hivyo, mwanachama huyo wa Rotary amesema mafanikio hayo yatategemea uwezo wa mamlaka inayohusika na maji kuendelea kutunza miundombinu hiyo na kuhakikisha mfumo unaendelea kukidhi mahitaji ya sasa na ya baadaye ya jamii.

Kwa hiyo, matengenezo ya mara kwa mara, ukarabati wa haraka, usimamizi madhubuti na mipango ya kukabiliana na ongezeko la mahitaji ni muhimu ili kuhakikisha uwekezaji huo unaendelea kufanya kazi na kutoa huduma ya maji ya uhakika kwa wakazi.

Mhandisi wa Mradi wa Maji wa Same-Mwanga-Korogwe, Emmanuel Maghembe, amesema Kijiji cha Ishinde hakikujumuishwa mwanzoni katika awamu ya kwanza ya mradi huo.

Wakati wakazi wakisubiri awamu ya pili kukifikia kijiji hicho, Maghembe amesema jamii zinaweza kutafuta vyanzo mbadala vya maji, ikiwamo kuchimba visima vyao wenyewe.

“Kuchimba visima ni wazo zuri, ingawa gharama inaweza kuwa kubwa kulingana na mazingira na uwezo wa kifedha wa wanakijiji,” amesema.

Amesema visima vilivyochimbwa na watu binafsi tayari vinasaidia jamii katika baadhi ya maeneo ya miji ya Mwanga na Same, ambako wakazi wengi wamewekeza katika vyanzo vyao vya maji.

“Kama wanakijiji wanaweza kumudu gharama za kuchimba visima, hilo linaweza kusaidia kupunguza ukali wa uhaba wa maji wakati wakisubiri awamu ya pili ya mradi,” amesema.

Maghembe amesema maofisa maendeleo ya jamii pia wanaweza kuwa na nafasi ya kuwakutanisha wakazi ili kutafuta kwa pamoja hatua za kushughulikia changamoto za maeneo yao, ikiwamo uhaba wa maji.

Uwekezaji wa pamoja wa jamii

Ofisa maendeleo ya jamii, ambaye ameomba kutotajwa jina kwa sababu hakuwa na mamlaka ya kuzungumza hadharani kuhusu suala hilo, amesema uwekezaji wa pamoja wa jamii katika kisima kimoja unaweza kuwa na manufaa zaidi kuliko kutarajia kila kaya kugharimia kisima chake.

“Sisi maofisa maendeleo ya jamii tuna jukumu la kuhamasisha na kuwakutanisha watu ili watambue na kutekeleza mipango inayolenga kutatua changamoto zinazolikabili eneo lao,” amesema.

Hata hivyo, ofisa huyo amekiri kuwa kukusanya fedha za kutosha kwa ajili ya kuchimba kisima kungekuwa changamoto kwa kaya nyingi za Ishinde kutokana na hali zao za kiuchumi.

“Kwa wanakijiji, inaweza kuwa vigumu kukusanya kiasi cha fedha kinachohitajika kuchimba kisima. Ndiyo maana mpango kama huo ungehitaji juhudi za pamoja na pengine msaada kutoka kwa wadau wengine,” amesema.

Chanzo cha maji kinachomilikiwa na jamii kinaweza kuwa suluhisho la muda iwapo wakazi, serikali za mitaa na washirika wa maendeleo watafanya kazi pamoja katika kutafuta rasilimali wakati wakisubiri mradi mkubwa wa Serikali.

“Hii haimaanishi kwamba Serikali inapaswa kuachana na mradi uliopangwa. Badala yake, ingesaidia jamii kupunguza adha wanayoipata wakati wakisubiri huduma kuu ya maji kuwafikia,” amesema ofisa huyo.

Uimarishaji wa mifumo

Mratibu wa Mtandao wa Maji na Usafi wa Mazingira Tanzania, Darius Mhawi amesema mifumo ya maji inayotumia sola inaweza kuimarishwa kwa kuchanganya uwezo wa kusukuma maji na wa kutosha wa kuyahifadhi.

“Pale ambapo nishati ya sola ndiyo kikwazo, njia moja ni kusukuma maji wakati nishati ya kutosha inapatikana na kuyahifadhi kwenye tangi lililoinuliwa ili yasambazwe baadaye,” amesema.

Ishinde, hilo si chaguo kwa wakazi wengi kwa sababu hawawezi kumudu gharama zinazohitajika.

Hata hivyo, ameonya kuwa suluhisho linalofaa hutegemea kiwango cha maji kinachozalishwa na kisima, idadi ya kaya zinazohudumiwa, mwinuko wa eneo, mahitaji ya maji kwa siku na uwezo wa pampu iliyopo.

Kwa hiyo, kwa Ishinde, suluhisho si lazima lianze kwa kutafuta chanzo kingine cha maji kutoka mwanzo.

Badala yake, kipaumbele kinaweza kuwa kutathmini kile kilichopo katika kila kitongoji na kubaini kiungo kinachokosekana, ama iwe ni matangi ya kuhifadhi maji, mabomba ya kuyasambaza, miunganisho ya kaya, uwezo wa kusukuma maji, fedha au usimamizi.

Kuziba pengo hilo kunaweza kubadilisha miundombinu iliyopo kuwa huduma ya maji ya uhakika majumbani ambayo wakazi wamekuwa wakiisubiri.

Post navigation

Previous: East Africa: Tanzania Launches Public Awareness Campaign for EAC Draft Constitution

Next: Kwanini ni muhimu SUK kuendeshwa kwa waraka wa pamoja

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

…Kamati yatilia shaka baadhi ya maeneo, yashauri

2 mins read

…Kamati yatilia shaka baadhi ya maeneo, yashauri

Habari za Dharura

October 28, 2026 Admin0

Samia ataka jumuiya za kiraia kuimarisha ulinzi wa maadili ya Taifa

4 mins read

Samia ataka jumuiya za kiraia kuimarisha ulinzi wa maadili ya Taifa

Habari za Dharura

October 28, 2026 Admin0

Ndejembi ataka vijana kuandaliwa kunufaika na miradi ya mafuta, gesi

4 mins read

Ndejembi ataka vijana kuandaliwa kunufaika na miradi ya mafuta, gesi

Habari za Dharura

October 28, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.