Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Samia ataka jumuiya za kiraia kuimarisha ulinzi wa maadili ya Taifa

4 mins read

Samia ataka jumuiya za kiraia kuimarisha ulinzi wa maadili ya Taifa

Habari za Dharura

October 28, 2026 Admin0

Dar es Salaam. Rais Samia Suluhu Hassan amezitaka jumuiya za kiraia, zikiwamo taasisi za kidini, kuweka mkazo katika kulinda maadili ya Taifa, akisema ni sehemu muhimu ya utambulisho wa Watanzania.

Wito huo umetolewa wakati kukiwa na matukio yanayoibua hofu kuhusu mmomonyoko wa maadili miongoni mwa baadhi ya wanafunzi, wakiwamo walioonekana kuchana na kuchoma madaftari na sare za shule baada ya kumaliza mitihani yao ya kidato cha nne.

Akisoma hotuba ya Rais Samia leo Jumatano, Oktoba 28, 2026, wakati wa ufunguzi wa mkutano wa siku tatu wa jumuiya za kiraia ulioambatana na maadhimisho ya miaka 70 ya jumuiya hiyo, Waziri wa Mambo ya Ndani, Patrobas Katambi amesema matukio ya hivi karibuni yanaashiria kuwepo kwa changamoto katika kulinda maadili.

Hata hivyo, amewataka viongozi wa jumuiya mbalimbali kushiriki kikamilifu kukabiliana na hali hiyo.

“Sote ni mashahidi kwamba katika siku za hivi karibuni kumekuwa na matishio ya mmomonyoko wa maadili katika Taifa letu,” amesema.

Amewaomba viongozi wa jumuiya mbalimbali, wakiwamo wa dini, kuweka mkazo katika kulinda maadili ya Watanzania, akisisitiza kuwa ni sehemu ya utambulisho wa Taifa.

Katika video zinazosambaa mitandaoni, baadhi ya wanafunzi waliohitimu kidato cha nne wameonekana wakichana na kuchoma vifaa vya shule, huku baadhi ya wasichana wakitoa kauli zinazokiuka maadili ya Mtanzania.

Katambi amesema matendo ya mtu yanaweza kuonesha utambulisho wake wa kitaifa hata anapokuwa nje ya nchi, jambo linaloonesha umuhimu wa kulinda na kuendeleza maadili yanayowatambulisha Watanzania.

“Tusiruhusu utambulisho wetu kama jamii yenye maadili mema uharibiwe kwa kutokufuata utamaduni, mila, mafunzo na makuzi yetu kama Watanzania,” amesema.

Jumuiya zachangia maendeleo

Katika hatua nyingine, Katambi amesema kadiri jumuiya zinavyokua na kuimarika, ndivyo mchango wake kwa jamii unavyozidi kuongezeka, akibainisha kuwa manufaa yake hayaishii kwa wanachama pekee.

Amesema jumuiya za kidini na zisizo za kidini zimewekeza katika sekta mbalimbali, zikiwamo elimu, afya, maji na utatuzi wa changamoto za kijamii.

Kutokana na mchango huo, amesema jumuiya za kiraia zina nafasi muhimu katika maendeleo ya Taifa, hivyo zinapaswa kuweka mbele masilahi ya wanachama na nchi kwa jumla.

Pia, amezitaka taasisi hizo kuendeleza umoja na mshikamano, akisisitiza kuwa zina wajibu wa kulinda amani na utulivu wa Taifa hata pale zinapokuwa na mitazamo tofauti.

Serikali yahakiki jumuiya

Msajili wa Jumuiya za Kiraia, Emmanuel Kihampa amesema tathmini ya ufuatiliaji wa jumuiya hizo inayofanywa na Serikali inayolenga kujiridhisha kuwa zinaendesha shughuli zake kwa mujibu wa katiba zilizowasilishwa wakati wa usajili.

Amesema tofauti na kipindi cha ukoloni, tathmini ililenga kubaini mambo ambayo yangeweza kuathiri ustawi wa utawala wa kikoloni, kwa sasa ufuatiliaji unalenga kujua iwapo taasisi hizo zinatekeleza majukumu yake kwa mujibu wa malengo yaliyosajiliwa.

Kihampa amesema ufuatiliaji huo pia unazingatia tahadhari za kimataifa kuhusu uwezekano wa mashirika yasiyo ya kifaida kutumiwa katika shughuli haramu.

Ametaja hatari hizo kuwa ni pamoja na utakatishaji wa fedha, ufadhili wa ugaidi, ufadhili wa biashara haramu ya silaha za maangamizi, usafirishaji wa binadamu na biashara ya dawa za kulevya.

Amesisitiza kuwa, uhakiki huo unafanywa kwa nia njema, ili kubaini na kuwaondoa wanaoweza kutumia mwamvuli wa asasi za kiraia kutekeleza shughuli zisizo halali.

Amesema mchakato huo unahusisha nyaraka zinazowasilishwa katika Ofisi ya Msajili pamoja na taratibu nyingine zinazohusiana na vyeti vya usajili.

Viongozi na wawakilishi kutoka Jumuiya mbalimbali za Kiraia, wakiwa katika Maadhimisho ya miaka 70 ya usajili wa Jumuiya za Kiraia, jijini Dar es Salaam leo. Picha na Michael Matemanga

“Lengo pia ni kujiridhisha kama asasi na jumuiya za kiraia bado zipo hai, zinatekeleza majukumu yale waliyowasilisha wakati wa kuomba usajili au zinafanya mengine tofauti. Ufuatiliaji tunaofanya unalenga kuwezesha taasisi hizi kufikia malengo yao,” amesema.

Wizara yasifu ushirikiano

Naibu Waziri wa Maendeleo ya Jamii, Jinsia, Wanawake na Makundi Maalumu, Marrypisca Mahundi amesema wizara hiyo imekuwa ikishirikiana moja kwa moja na jumuiya za kiraia kupitia Idara ya Maendeleo ya Jamii.

Amesema jumuiya hizo ni wadau muhimu katika utekelezaji wa majukumu ya wizara kwa sababu zinafanya kazi moja kwa moja na wananchi na kuelewa changamoto zinazowakabili.

“Wizara yetu ni mtambuka na katika kutekeleza majukumu yetu, hawa (jumuiya) ni wadau muhimu wanaotusaidia kwa sababu wanaishi na jamii,” amesema Mahundi.

Post navigation

Previous: Ndejembi ataka vijana kuandaliwa kunufaika na miradi ya mafuta, gesi

Next: …Kamati yatilia shaka baadhi ya maeneo, yashauri

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

…Kamati yatilia shaka baadhi ya maeneo, yashauri

2 mins read

…Kamati yatilia shaka baadhi ya maeneo, yashauri

Habari za Dharura

October 28, 2026 Admin0

Ndejembi ataka vijana kuandaliwa kunufaika na miradi ya mafuta, gesi

4 mins read

Ndejembi ataka vijana kuandaliwa kunufaika na miradi ya mafuta, gesi

Habari za Dharura

October 28, 2026 Admin0

Mtoto wa nje ya ndoa kurithishwa mali kwazua mjadala

5 mins read

Mtoto wa nje ya ndoa kurithishwa mali kwazua mjadala

Habari za Dharura

October 28, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.