Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Bima ya Afya kwa Wote II kulenga kaya 625,000

11 mins read

Bima ya Afya kwa Wote II kulenga kaya 625,000

Habari za Dharura

January 17, 2026October 23, 2026 Admin0

Mtwara. Serikali imewataka watumishi wa afya, viongozi wa mikoa na wilaya pamoja na mamlaka za serikali za mitaa kuhakikisha mpango wa Bima ya Afya kwa Wote unawafikia wananchi wote, ili Mtanzania yeyote asikose huduma za matibabu kwa sababu ya ukosefu wa fedha.

Wito huo umetolewa na Waziri wa Afya, Mohamed Mchengerwa, wakati wa uzinduzi wa kitaifa wa awamu ya pili ya utekelezaji wa mpango huo uliofanyika leo Alhamisi, Oktoba 22, 2026, katika Uwanja wa Sabasaba mkoani Mtwara. Uzinduzi kama huo pia umefanyika katika mikoa yote nchini.

Mchengerwa amesema Serikali inalenga kusajili kaya 625,000 katika awamu hiyo, huku ikiendelea kugharamia bima kwa wananchi wasio na uwezo wa kujilipia.

Ameelekeza viongozi wa Serikali, wenyeviti wa vijiji, mitaa na vitongoji pamoja na wadau mbalimbali kuhakikisha elimu kuhusu bima hiyo inawafikia wananchi katika maeneo wanayoishi na kufanya shughuli zao za kiuchumi.

Pia, ametangaza mpango wa kuteua mabalozi wa Bima ya Afya kwa Wote katika kila wilaya nchini, akisema watakuwa na jukumu la kuelimisha jamii, kuhamasisha usajili na kusaidia kuhakikisha malengo ya uandikishaji yanafikiwa.

Mabalozi hao watatoka katika makundi mbalimbali kama viongozi wa dini na kimila, walimu, wataalamu wa afya, wasanii, wanamichezo, wafanyabiashara, wakulima, wafugaji, wavuvi, wanawake, vijana, wazee na watu wenye ulemavu.

Kwa mujibu wa Mchengerwa, mabalozi hao watashirikiana na uongozi wa wilaya kufuatilia maendeleo ya usajili, kukutana na wakuu wa wilaya kila mwezi kutathmini utekelezaji na kuwasilisha taarifa kwa Wizara ya Afya kila robo mwaka.

“Ushawishi ni dhamana; tuutumie kulinda afya na utu wa wananchi wetu,” alisema, akiwataka watu wenye ushawishi katika jamii kutumia nafasi zao kuhamasisha wananchi kujiunga na bima hiyo.

Alisema uandikishaji wa wananchi katika mpango huo unapaswa kuwa kipimo cha utendaji kwa wakuu wa mikoa na wilaya, akitolea mfano Mkoa wa Mtwara ambao alisema unaongoza kitaifa katika kuwafikia walengwa wa awamu ya kwanza.

Kifurushi cha Sh150,000

Katika hatua nyingine, Mchengerwa alitangaza kifurushi cha Fahari Afya, kinacholenga wananchi wenye kipato cha kawaida, ambacho kitagharimu Sh150,000 kwa mwaka kwa kaya yenye watu wasiozidi sita.

Alisema kifurushi hicho kitamwezesha mwananchi kupata huduma za afya kuanzia zahanati hadi hospitali ya Taifa, kwa kufuata utaratibu wa rufaa na kitatolewa kupitia Mfuko wa Taifa wa Bima ya Afya (NHIF) pamoja na kampuni binafsi za bima zilizoidhinishwa na Serikali.

Alifafanua kuwa awamu ya pili imepanua wigo wa wananchi wanaoweza kujiunga na bima hiyo, wakiwamo wafanyabiashara, wakulima, wafugaji, wavuvi, madereva wa bodaboda, mama lishe na wafanyakazi wa kampuni binafsi.

Mchengerwa alisisitiza kuwa Bima ya Afya kwa Wote haimaanishi kila mwananchi atapata huduma bure, bali wenye uwezo watachangia gharama za bima zao na familia zao kulingana na utaratibu uliowekwa.

Kwa wananchi wasiokuwa na uwezo, alisema Serikali itaendelea kugharamia bima zao kupitia utaratibu wa kuwatambua walengwa kwa kushirikisha mamlaka husika, jamii na Mfuko wa Maendeleo ya Jamii (TASAF).

“Kwa hiyo, mwenye uwezo atachangia, na asiye na uwezo atasaidiwa na Serikali. Hakuna Mtanzania atakayebaki nje ya kisima hiki kwa sababu hana ndoo,” alisema.

Aliwataka wananchi wanaotaka kujiunga na bima yoyote kuhakikisha wanaelewa vifurushi wanavyochagua na huduma zinazotolewa, akisisitiza kuwa ni haki yao kufahamu manufaa ya bima wanayolipia.

NHIF kufanya mageuzi

Mchengerwa alisema utekelezaji wa awamu ya pili unaambatana na mageuzi makubwa ya NHIF ili kuiwezesha kutekeleza jukumu lake jipya la kuhudumia Watanzania wengi zaidi, tofauti na mfumo wake wa awali uliojikita katika watumishi wa umma.

Alisema mageuzi hayo yatajumuisha kuimarisha usajili, uhakiki na malipo kwa njia za kidijitali, ili wananchi waweze kupata huduma hizo kupitia simu, mawakala na mitandao ya taasisi za fedha bila kulazimika kusafiri umbali mrefu kufuata kadi.

Pia, alielekeza madai ya vituo vya kutolea huduma za afya yalipwe kwa wakati, akisema ucheleweshaji wa malipo unaweza kuathiri uwezo wa vituo kuhudumia wagonjwa.

Alisema mifumo ya kidijitali itasaidia kuongeza uwazi katika kufuatilia waliojiandikisha, waliopata matibabu na malipo yaliyofanyika, huku NHIF ikipewa jukumu la kusimamia ubora wa huduma zinazotolewa kwa wanufaika wa bima.

Alionya kuwa Serikali haitavumilia ubadhirifu wa fedha za michango ya wananchi, akisema kila shilingi inayopotea katika mfuko huo inaweza kuathiri upatikanaji wa dawa na huduma kwa wagonjwa.

Aidha, aliitaka Mamlaka ya Usimamizi wa Bima Tanzania (Tira) kusimamia kampuni za bima ya afya, kuhakikisha zinatunza michango ya wananchi, zinalipa madai kwa wakati na hazimnyimi mnufaika anayestahili huduma.

Alisema mifumo ya kidijitali na mamlaka za usimamizi zitasaidia kudhibiti udanganyifu, hivyo amewataka wananchi kutotumia kadi za watu wengine, kutoa taarifa za uongo kupata huduma au kujifanya hawana uwezo wakati wanaweza kujilipia.

Pia, aliwaonya watoa huduma dhidi ya kudai malipo ya wagonjwa ambao hawakuwatibu, akisema udanganyifu wa mtu mmoja unaweza kuathiri manufaa ya wananchi wengine.

Kaya 198,709 zasajiliwa

Akielezea matokeo ya awamu ya kwanza ya mpango huo, Mchengerwa amesema kaya 198,709 kati ya kaya 276,004 za wananchi wasio na uwezo zilihakikiwa na kupewa kadi za bima, sawa na asilimia 72 ya lengo.

Alisema baadhi ya wananchi waliopata kadi wameanza kunufaika na huduma za matibabu bila kulazimika kuuza mali zao ili kugharamia matibabu.

Aliwataka wananchi ambao kadi zao zipo lakini hawajazichukua kujitokeza ili waanze kunufaika na huduma zinazotolewa.

Waziri huyo alisema mafanikio ya mpango huo yanategemea pia kuhakikisha usajili unawafikia wananchi walio katika mazingira magumu, wakiwamo wazee wasioweza kufika kwenye ofisi za Serikali, wajane na watoto yatima wasiokuwa na walezi wa kuwasaidia kujiandikisha.

Alisema ahadi ya bima kwa wote haiwezi kutimia ikiwa itawanufaisha wanaoweza kufika katika ofisi za usajili pekee, huku wengine wakiachwa kutokana na umbali, changamoto za mawasiliano au kukosa msaada.

Nyerere na vita vya maradhi

Akielezea umuhimu wa mpango huo, Mchengerwa alirejea falsafa ya Baba wa Taifa, Mwalimu Julius Nyerere kuhusu maadui watatu wa maendeleo ya Tanzania, ambao ni ujinga, maradhi na umaskini.

Alisema Mwalimu Nyerere alisisitiza maadui hao wanategemeana, kwa kuwa maradhi yanaweza kusababisha umaskini na umaskini kuongeza uwezekano wa watu kukosa huduma za afya.

“Leo tunavunja mzunguko huo. Leo tunasema: maradhi hayatakuwa tena mlango wa umaskini,” alisema.

Aliongeza Bima ya Afya kwa Wote si hisani ya Serikali kwa wananchi, bali ni njia ya kuhakikisha kila Mtanzania anapata haki ya matibabu bila kuathiriwa na uwezo wake wa kifedha.

Mchengerwa alisema afya ya wananchi inapaswa kupewa kipaumbele kwa kuwa mtu mwenye afya ana nafasi nzuri ya kufanya kazi, kupata kipato, kulea familia na kuchangia maendeleo ya taifa.

Alisema pia wito wa Mwalimu Nyerere wa Watanzania kujenga shule na zahanati kwa nguvu zao, unaakisi umuhimu wa ushiriki wa wananchi katika kufanikisha mpango huo.

“Bima ya Afya kwa Wote haitajengwa na Serikali peke yake. Itajengwa na kila Mtanzania atakayechukua kiberiti na kumwashia mwenzake,” alisema.

Mchango wa Rais Samia

Katika hotuba hiyo, Mchengerwa alitambua mchango wa Rais Samia Suluhu Hassan katika kuimarisha miundombinu na huduma za afya, akisema hatua zilizochukuliwa katika miaka ya karibuni zimeweka msingi wa utekelezaji wa bima hiyo.

Alisema katika kipindi cha miaka mitano iliyopita, vituo vipya 3,530 vya afya vimejengwa, hospitali zimepatikana katika wilaya zote 184, huku idadi ya vitanda vya hospitali ikiongezeka kutoka 86,000 hadi 145,000.

Pia, alisema upatikanaji wa dawa kwenye rafu za vituo vya afya umeongezeka kutoka asilimia 58 mwaka 2021 hadi karibu asilimia 90 wakati wa hotuba hiyo.

Kwa mujibu wa Mchengerwa, uwekezaji huo umeimarisha uwezo wa mfumo wa afya kuhudumia wananchi wanaojiunga na bima.

Alisema lengo la mpango huo ni kuhakikisha wananchi hawalazimiki kuuza mashamba, mifugo au mali nyingine ili kupata fedha za matibabu.

Awali, Mbunge wa Mtwara Mjini (CCM), Joel Nanauka, aliiomba Serikali kukamilisha miradi ya afya inayoendelea mkoani humo na kuhakikisha hospitali zinapata vifaa tiba ili wananchi wapate huduma wanapokwenda kutibiwa.

Nanauka ambaye pia ni Waziri wa Nchi, Ofisi ya Rais, Maendeleo ya Vijana amesisitiza umuhimu wa kukamilisha miundombinu na kuweka vifaa vinavyohitajika kutoa huduma.

Amesema baadhi ya miradi ya afya imefikia hatua ya ujenzi, lakini inahitaji kukamilishwa na kuwekewa vifaa ili kuwawezesha wataalamu kutoa huduma zinazostahili kwa wananchi.

Ametaja vifaa vya uchunguzi, ikiwemo mashine za X-ray, akisema upatikanaji wake ni muhimu katika kuhakikisha wagonjwa wanapata huduma katika hospitali zilizo karibu nao.

Nanauka ameitaja Hospitali ya Wilaya ya Nanyamba kuwa miongoni mwa maeneo yanayohitaji kipaumbele, akiiomba Serikali kuelekeza fedha za vifaa tiba na kukamilisha mahitaji yaliyobaki ili wananchi waanze kunufaika na huduma hospitalini hapo.

“Tunaomba Serikali iendelee kutusaidia katika miradi hii ya afya na upatikanaji wa vifaa tiba, ili wananchi wetu waweze kwenda kutibiwa hapa hapa badala ya kupata changamoto ya kutafuta huduma sehemu nyingine,” amesema.

Amesema juhudi za kuboresha huduma za afya zinapaswa kuzingatia mahitaji halisi ya wananchi kwa kukamilisha majengo yanayojengwa na kuhakikisha yana vifaa vinavyohitajika kabla ya kuanza kutoa huduma zinazotarajiwa.

Ombi hilo limekuja wakati Serikali ikiendeleza mpango wa Bima ya Afya kwa Wote, unaolenga kusaidia wananchi kupata matibabu na kupunguza mzigo wa gharama zinazoweza kuikabili familia mmoja wa wanafamilia anapougua.

Akizungumzia umuhimu wa mpango huo, Mbunge wa Isiman na mwakilishi wa Kamati ya Kudumu ya Bunge ya Afya na Ukimwi, Emmanuela Mtatifikolo, amesema bima inaweza kuwasaidia wananchi wanaokabiliwa na gharama kubwa za matibabu.

“Milioni nane kwa mtu wa kijijini ni fedha nyingi sana, gharama za matibabu zinazoweza kufikia Sh8 milioni hadi Sh10 milioni, ni mzigo mkubwa kwa wananchi wengi,” amesema.

Mtatifikolo amewahimiza wananchi kujiunga na bima ili kupunguza hatari ya kushindwa kumudu gharama za matibabu wanapougua. Amesema mchango wa Sh150,000 kwa watu sita kwa mwaka ni sawa na Sh25,000 kwa kila mtu kwa mwaka.

Mifumo ya Tehama

Akitoa maelezo mafupi ya utekelezaji, Katibu Mkuu wa Wizara ya Afya, Dk Grace Magembe, amesema wizara hiyo itaendelea kuimarisha mifumo ya Tehama, usimamizi wa dawa na vifaa tiba ili kuhakikisha utekelezaji wa Bima ya Afya kwa Wote unaendana na utoaji wa huduma bora kwa wananchi.

Amesema mafanikio ya mpango huo hayatapimwa kwa idadi ya wananchi wanaojiandikisha pekee, bali pia uwezo wa mfumo wa afya kutoa huduma kwa wakati, kwa kuzingatia utu, haki na mahitaji ya wananchi.

“Wizara ya Afya itaendelea kushirikiana na taasisi mbalimbali, ikiwemo Ofisi ya Waziri Mkuu-Tamisemi na wadau wengine, kuimarisha mifumo ya utoaji huduma na kuhakikisha mapato yatakayopatikana kupitia bima hiyo yanaelekezwa katika kuboresha huduma za afya,” amesema Dk Magembe.

Hata hivyo, amewataka watumishi wa sekta ya afya kuboresha huduma kwa wateja na kubadili mitazamo yao ili kuwahamasisha wananchi kujiunga na kuendelea kutumia bima ya afya.

Amesisitiza kuwa mpango huo ni fursa ya kuimarisha huduma zilizopo na kuongeza mapato kwa ajili ya maendeleo ya sekta ya afya.

Mkazi wa Mtwara Mjini, Abdilah Mohamed, amesema bima hiyo itawasaidia watu wa kipato cha chini ambao wamekuwa wakihangaika kupata huduma za afya wanapokosa fedha.

“Nashukuru nimepata huduma hapa na ninajiunga na kifurushi cha Ngorongoro cha Sh54,000. Sasa nakwenda kuchukua kitambulisho cha mke wangu na cheti cha kuzaliwa cha mtoto wangu. Mapokezi yake kwetu ni mazuri,” amesema Mohamed.

Salima Machemba amesema amefurahi kufika katika uzinduzi huo ambao utakuwa na manufaa kwa familia zao kwani kutokuwa na bima ya afya gharama za matibabu zinakuwa mzigo kwa familia yake, na anategemea kipato cha vibarua vya shambani.

“Hili jambo kwangu lilikuwa vigumu kupata matibabu, na nilitegemea kipato cha vibarua vya shambani kulipa gharama za matibabu. Fedha ambazo ningetumia kwa matibabu sasa zinaweza kusaidia ustawi wa familia yangu.”amesema Salma.

Post navigation

Previous: Siri ya kutoka kwenye ajira hadi kujiajiri

Next: Tanzania: Parents Urged to Invest in Education for Sustainable Development

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

3 mins read

Tanzania: Sauti Za Busara Unveils Line-Up, Moves Festival to March

Habari za Dharura

October 26, 2026 Admin0

Vyuo vinatafiti, Taifa linanufaika? | Mwananchi

8 mins read

Vyuo vinatafiti, Taifa linanufaika? | Mwananchi

Habari za Dharura

October 26, 2026 Admin0

Joto kali, mvua na upepo waharibu mamia ya nyumba

7 mins read

Joto kali, mvua na upepo waharibu mamia ya nyumba

Habari za Dharura

October 26, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.