Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Ripoti za CAG kulipima Bunge la 13, Halima Mdee akifunguka

4 mins read

Ripoti za CAG kulipima Bunge la 13, Halima Mdee akifunguka

Habari za Dharura

October 27, 2026 Admin0

Dodoma. Mkutano wa tano wa Bunge unatarajiwa kuanza leo jijini Dodoma, huku macho na masikio ya wananchi yakielekezwa kwenye michango ya wabunge kuhusu ripoti za Mdhibiti na Mkaguzi Mkuu wa Hesabu za Serikali (CAG).

Hata hivyo, baadhi ya wabunge wa zamani wanatabiri kuwa mijadala mingi haitakuwa na makali, wakieleza kuwa muundo wa Bunge la 13, ambako wabunge wengi ni wa chama kimoja, unaweza kudhoofisha uchambuzi na uwajibikaji.

Katika Bunge hilo, itakuwa mara ya kwanza kwa wabunge kujadili ripoti za CAG tangu uchaguzi mkuu wa mwaka jana, ambao uliwaingiza wabunge wengi wapya.

Kwa mujibu wa Ibara ya 143 ya Katiba ya Jamhuri ya Muungano wa Tanzania ya mwaka 1977, Machi 30, 2026, CAG, Charles Kichere alimkabidhi Rais Samia Suluhu Hassan ripoti zenye kaguzi 1,554 za mwaka wa fedha 2024/25.

Serikali iliwasilisha ripoti hizo bungeni Aprili 2026, kwa ajili ya kujadiliwa na wabunge kwa mujibu wa utaratibu uliowekwa.

Ripoti hizo zinajumuisha ukaguzi wa Serikali kuu, Tawala za Mikoa na Serikali za Mitaa (Tamisemi), mashirika ya umma, miradi ya maendeleo na mifumo ya Teknolojia ya Habari na Mawasiliano (Tehama).

Nyingine ni ripoti za ufuatiliaji wa utekelezaji wa mapendekezo ya ukaguzi wa ufanisi na ripoti 19 za ukaguzi wa ufanisi katika sekta mbalimbali. Pia kulikuwa na kaguzi za taarifa za fedha 1,339, ambapo 1,326, sawa na asilimia 99, zilipewa hati safi.

Mdee atabiri mijadala isiyo na makali

Mwenyekiti wa zamani wa Kamati ya Hesabu za Serikali za Mitaa (LAAC), Halima Mdee akizungumza na Mwananchi leo Jumatatu, Oktoba 26, 2026, amesema hatarajii kuona mabadiliko makubwa katika mijadala ya ripoti hizo kutokana na muundo wa Bunge lenyewe.

Mdee ambaye kwa sasa anajiita mkulima hodari, amesema uwakilishi mdogo wa upinzani bungeni unaweza kufanya mijadala ya kamati za Bunge kukosa makali ya kutosha.

Mdee aliingia bungeni kwa mara ya kwanza 2005 kupitia Viti Maalum (Chadema) kwa vipindi viwili kabla ya kuongoza Jimbo la Kawe.

Hivyo, amekuwa na uzoefu wa kushiriki shughuli za kamati za Bunge. Katika Bunge la 12, aliongoza LAAC na kuelekeza sehemu ya mijadala yake kwenye matumizi ya mikopo ya asilimia 10 kwa vijana, wanawake na watu wenye ulemavu.

“Mazingira ya kawaida ya Bunge la 13, nakuambia hakutakuwa na jambo jipya zaidi ya kusema ndiyo. Ule uchambuzi wa kina watu wasiutegemee, kwani itakuwa ni ‘more than business as usual,” amesema.

Amesema ukaguzi wa CAG hautakuwa na tija ya kutosha ikiwa mifumo ya kuwawajibisha wahusika haitaimarishwa.

Lulida ataja mianya ya upigaji

Kwa upande wake, aliyekuwa Mbunge wa Viti Maalumu, Ridhiki Lulida amesema bado kuna mianya mingi ya ubadhirifu nchini ambayo haijazibwa.

Ametaja changamoto hizo kuwa ni mifumo kutokusomana, Serikali kushiriki katika shughuli za kibiashara, ufuatiliaji hafifu wa wageni wanaojihusisha na biashara katika ngazi za chini na usajili holela wa vitalu vya uchimbaji madini.

Amesema changamoto hizo zinaweza kuendelea kujitokeza katika ripoti za CAG kila mwaka iwapo hatua madhubuti hazitachukuliwa.

Hata hivyo, Mbunge wa Ukonga, Bakari Shingo amesema wabunge wamejiandaa kuishauri Serikali kuhusu maeneo yenye mianya ya upotevu wa mapato na kupendekeza hatua za kurekebisha hali hiyo.

“Tumejipanga kuishauri Serikali na kuipa njia ya namna gani inaweza kufanya kazi yake kwa kuziba mianya ya upotevu wa mapato ambayo yangeweza kuwa msaada mkubwa kwa wananchi,” amesema.

Mbunge wa Tarime Vijijini, Mwita Waitara amependekeza adhabu kali kwa wanaofuja mapato na kuiba mali za umma, akisema vitendo hivyo vinawaumiza wananchi.

Amesema Serikali inapaswa kuacha kuwahurumia wahusika wa ubadhirifu kwa sababu hatua dhaifu zinaweza kuwafanya watumishi wengine kuona adhabu zilizopo si kikwazo.

Dalili za mijadala yenye mvutano zimeonekana katika kamati za Bunge. LAAC, inayoongozwa na Mbunge wa Tunduru Kaskazini, Ado Shaibu, ilikataa baadhi ya taarifa za halmashauri, ikiwemo Halmashauri ya Wilaya ya Same, kwa madai ya wahusika kuwa wakaidi katika kujibu hoja.

Nayo Kamati ya Hesabu za Serikali Kuu (PAC), inayoongozwa na Mbunge wa Viti Maalumu, Devotha Minja, imeibua maswali kuhusu taarifa za DART na Chuo Kikuu cha Mzumbe.

Katika tathmini yake, Taasisi ya Wajibu Institute of Public Accountability ilibainisha changamoto zinazojirudia katika ukusanyaji wa mapato, usimamizi wa madeni, utekelezaji wa bajeti, ununuzi wa umma na miradi ya maendeleo.

Taasisi hiyo pia ilitaja matumizi nje ya bajeti, ucheleweshaji wa miradi na mikataba isiyozingatia taratibu kuwa ni maeneo yanayoweza kuchochea rushwa, ubadhirifu na udanganyifu katika taasisi za umma.

Post navigation

Previous: Ishinde water gap: Why some residents are still missing out

Next: Haya hapa maeneo yanayokwamisha biashara nchini

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Tanzania records 7,219 rape cases in 2025

1 min read

Tanzania records 7,219 rape cases in 2025

Habari za Dharura

October 27, 2026 Admin0

Nearly 782,000 SGR tickets go unused in nine months

2 mins read

Nearly 782,000 SGR tickets go unused in nine months

Habari za Dharura

October 27, 2026 Admin0

Tume yaanza kusaka waliopanga, kufadhili ghasia za Oktoba 29

3 mins read

Tume yaanza kusaka waliopanga, kufadhili ghasia za Oktoba 29

Habari za Dharura

October 27, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.