Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Wataalamu wataja mbinu kulinda utajiri wa familia

4 mins read

Wataalamu wataja mbinu kulinda utajiri wa familia

Habari za Dharura

October 25, 2026 Admin0

Dar es Salaam. Utajiri wa familia uliojengwa kwa miongo kadhaa, unaweza kupotea ndani ya kizazi kimoja ikiwa wamiliki wa biashara watashindwa kupanga mapema nani atakayechukua usimamizi na udhibiti wa mali zao, wataalamu wameonya.

Migogoro ya kifamilia kuhusu umiliki, urithi, usimamizi wa biashara na matumizi ya mali, imekuwa ikitishia kuvunja uhusiano wa ndugu na kudhoofisha biashara zilizochukua miaka mingi kujengwa.

Kwa mujibu wa Sirdar Group, kampuni yenye makao yake Afrika Kusini, chini ya asilimia 30 ya biashara za familia barani Afrika huendelea kuendeshwa na kizazi cha pili, huku chini ya asilimia 10 zikifanikiwa kufika kizazi cha tatu.

Ingawa kuna sababu mbalimbali zinazoweza kuchangia biashara hizo kushindwa kuendelea, kukosekana kwa mipango thabiti ya kurithishana uongozi kumetajwa kuwa miongoni mwa changamoto kubwa zinazoathiri uhai wake.

Hoja hiyo iliibuka katika mkutano wa kujadili urithishaji wa utajiri na utawala wa familia ulioandaliwa hivi karibuni na Stanbic Private Banking, ambapo wataalamu waliwahimiza wamiliki wa biashara kuanza mazungumzo ya urithi mapema kabla ya kifo, kustaafu au migogoro ya kifamilia kuwalazimisha kufanya hivyo.

Wataalamu hao walisema mipango ya wazi ya urithi, katiba za familia, miundo inayoeleweka ya umiliki na maandalizi ya mapema ya kizazi kijacho, vinaweza kusaidia kulinda mali dhidi ya migogoro.

Maandalizi yaanze mapema

Mmoja wa waanzilishi na mshirika mkuu wa Sirdar Group, Tim Holmes, alisema utawala wa familia unapaswa kuanza wakati mwanzilishi wa biashara bado yuko hai na familia ikiwa na umoja.

Alisema ni bora kuweka mifumo ya usimamizi mapema kabla familia haijaingia katika migogoro na kutokukubaliana kuhusu mali na biashara.

Kwa mujibu wa Holmes, katiba ya familia inaweza kuweka misingi ya pamoja kuhusu namna maamuzi yatakavyofanywa, majukumu ya kila mwanafamilia na matumizi ya rasilimali kusaidia watoto.

Alionya kuwa bila makubaliano hayo, maamuzi yanayoonekana madogo wakati mwanzilishi akiwa hai, yanaweza baadaye kuwa chanzo cha migogoro mikubwa.

Kwa hiyo, lengo la mipango hiyo ni kuhakikisha kuwa wanafamilia wanaelewa na kukubaliana kuhusu misingi ya kufanya uamuzi kabla tofauti hazijajitokeza.

Kwa upande wake, mwanzilishi na Mtendaji Mkuu wa Noesis Strategic Institute, Murtaza Virsi, alisema familia nyingi hukosea kwa kudhani kuwa watoto wataweza kusimamia utajiri kwa sababu tu wamezaliwa katika familia yenye mali.

Alisema uongozi, nidhamu na uwajibikaji ni sifa zinazopaswa kujengwa tangu utotoni, badala ya kusubiri mtoto apewe jukumu la kusimamia biashara au mali za familia.

Virsi alieleza kuwa hata majukumu ya kawaida ya utotoni yanaweza kumjengea mtoto nidhamu, uthabiti na uwezo wa kuwajibika, ambazo ni sifa muhimu kwa viongozi wa baadaye.

Pia alihimiza familia kuwashirikisha watoto katika shughuli za biashara mapema na kuwapa nafasi ya kuuliza maswali, kujadili mawazo na kupinga mitazamo iliyopo kwa hoja.

Alisema mfumo wa malezi unaotegemea baba kuzungumza huku mtoto akisikiliza pekee, huenda usitoshe kuwaandaa vijana kukabiliana na mazingira changamani ya biashara za kisasa.

Kwa mtazamo wake, kuwaandaa warithi kunahitaji kuwapa nafasi ya kujenga uwezo wao wa kufanya uamuzi, badala ya kutarajia waige kila kitu ambacho waanzilishi walikuwa wakifanya.

Aliongeza kuwa mtoto anaweza kurithi hisa, majengo au mali nyingine bila kuwa na uzoefu, hamasa au ujuzi wa kusimamia biashara kubwa.

Hivyo, mipango ya urithi inapaswa kuambatana na mifumo bora ya kitaalamu ya usimamizi.

Mkuu wa Stanbic Private Banking, Shangwe Kisanji, alisema lengo la kuwakutanisha familia na wataalamu lilikuwa kuwahamasisha wamiliki kuangalia zaidi ya kujenga utajiri na kujiuliza namna mali, biashara na maadili yao vitakavyodumu baada ya madaraka kukabidhiwa kwa kizazi kijacho.

Alisema urithi haupaswi kujadiliwa pale tu mwanzilishi anapokaribia kustaafu au mwanafamilia anapofariki, bali unahitaji mazungumzo ya mapema, maandalizi na mifumo inayoweza kukabiliana na mabadiliko ya hali za kifamilia.

Kwa mujibu wa Kisanji, familia zinapaswa kubadilisha mtazamo kutoka kujenga utajiri pekee na kuanza kuhakikisha unadumu wakati wa mabadiliko ya uongozi.

Ujumbe huo unaweka wazi umuhimu wa wamiliki wa biashara kupanga mapema kuhusu urithi, kuandaa warithi wenye uwezo na kuweka kanuni za usimamizi zinazolinda biashara na uhusiano wa kifamilia.

Hatua hizo zinaweza kusaidia kuhakikisha kuwa utajiri uliojengwa kwa juhudi za kizazi kimoja, unakuwa msingi wa maendeleo ya vizazi vinavyofuata badala ya kuwa chanzo cha migogoro na hasara.

Post navigation

Previous: Tanzanian university students make sci-fi movie about alien invasion

Next: Epuka mambo yanayomfanya mtoto ajione hana thamani

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

3 mins read

Tanzania: Sauti Za Busara Unveils Line-Up, Moves Festival to March

Habari za Dharura

October 26, 2026 Admin0

Vyuo vinatafiti, Taifa linanufaika? | Mwananchi

8 mins read

Vyuo vinatafiti, Taifa linanufaika? | Mwananchi

Habari za Dharura

October 26, 2026 Admin0

Joto kali, mvua na upepo waharibu mamia ya nyumba

7 mins read

Joto kali, mvua na upepo waharibu mamia ya nyumba

Habari za Dharura

October 26, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.