Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Wataalamu waonya vijana wanaovuta harufu ya petrol kusahau matatizo

4 mins read

Wataalamu waonya vijana wanaovuta harufu ya petrol kusahau matatizo

Habari za Dharura

October 30, 2026 Admin0

Moshi. Baadhi ya vijana wamegeukia kuvuta harufu ya petroli wakiamini inawasaidia kusahau matatizo ya maisha, lakini wataalamu wa afya wanaonya kuwa tabia hiyo inaweza kuathiri mfumo wa fahamu, kumbukumbu na kuongeza hatari ya saratani.

Bahati Gaudence, mkazi wa Moshi mjini, amesema alianza kuvuta harufu ya petroli akiwa na miaka 11 baada ya kushawishiwa na marafiki zake, akiamini kuwa ingemsaidia kujitenga na changamoto za maisha.

Kwa sasa, amesema amekuwa akitumia petroli kwa muda mrefu, huku akieleza kuwa anapovuta harufu yake huhisi kana kwamba matatizo yanayomkabili yanatoweka kwa muda.

“Nimeshatumia harufu ya petroli kwa muda mrefu sana. Nilipokuwa navuta, nilijihisi kama sina changamoto yoyote ya kimaisha, unasahau matatizo yote,” amesema.

Bahati, aliyezungumza na Mwananchi Oktoba 28, 2026, ameeleza kuwa alianza tabia hiyo akiwa Arusha baada ya kushawishiwa na marafiki zake.

“Unamkuta mwenzako ameshika kichupa anakushauri na wewe ujaribu siku moja, unajikuta umejiingiza huko, na huwezi kutoka huko,” amesimulia.

Amesema anapotumia petroli hataki kuzungumza na mtu wala kusumbuliwa, akieleza kuwa hali hiyo humfanya ajitenge na mazingira yanayomzunguka.

“Nahisi kama nimezima kila kitu na nasahau shida zote za dunia,” amesema.

Ameongeza kuwa wakati mwingine matumizi hayo humfanya asihisi haja ya kula au kufanya shughuli nyingine, akieleza kuwa petroli ya Sh1,000 inaweza kumtosha kwa siku mbili au tatu.

Kwa upande wake, Baraka Muba amesema alianza kutumia petroli mwaka 2003 kutokana na matatizo ya kifamilia yaliyomfanya kutafuta njia ya kusahau changamoto zake.

“Tunatumia kwa sababu ya kusahau shida zetu. Watu wengi unakuta tuna shida, kwa hiyo ili kusahau tunatumia kufuta kumbukumbu kichwani,” amesema.

Ameeleza kuwa wakati mwingine mtumiaji huhisi kama amejitenga kabisa na mazingira yanayomzunguka.

“Unajikuta unajizima data kwa muda fulani na unahisi kama umekufa, husikii chochote yaani,” amesema.

Sababu zake, madhara

Mtaalamu wa afya ya akili na Mkurugenzi Mtendaji wa Family Vibes Foundation, Dk Mayrose Majinge amesema baadhi ya watu hujiingiza katika matumizi hayo kutokana na changamoto za kijamii na kisaikolojia.

Amezitaja sababu hizo kuwa ni upweke, kutengwa na jamii, ukosefu wa ajira, msongo wa mawazo na kukosa mwelekeo wa maisha.

Amesema baadhi ya watumiaji hutumia petroli kama njia ya kukwepa matatizo badala ya kutafuta suluhisho, akisisitiza umuhimu wa jamii kuwasaidia watu wanaokabiliwa na changamoto badala ya kuwatenga.

Akizungumzia madhara ya kiafya, Daktari Bingwa wa Afya ya Mwili na Macho kutoka Taasisi ya Magonjwa ya Kuambukiza Tanzania (TIDI), Bature Lukiko amesema kuvuta harufu ya petroli kunaweza kuathiri mifumo mbalimbali ya mwili.

Mmoja akionyesha ujazo wanaotumia kuvuta kwenye moja ya chupa ambayo ameishika mkononi.

Ametaja madhara ya muda mfupi kuwa ni kizunguzungu, maumivu ya kichwa, kichefuchefu, kutapika, kukohoa, kuwashwa kwa macho na pua, pamoja na kupungua kwa umakini.

Kwa matumizi ya muda mrefu, amesema kemikali zilizomo kwenye petroli zinaweza kuathiri mapafu na mfumo wa fahamu, pamoja na kusababisha matatizo ya kumbukumbu.

Dk Lukiko ameeleza kuwa benzene, kemikali inayopatikana kwenye petroli, inaweza kuharibu uroto unaohusika na utengenezaji wa chembe za damu na kusababisha upungufu wa damu.

Pia, amesema kemikali hiyo huongeza hatari ya kupata saratani, akionya kuwa kuvuta petroli si njia salama ya kukabiliana na msongo wa mawazo.

Daktari bingwa wa magonjwa ya ndani na magonjwa ya kuambukiza katika Hospitali ya KCMC, Elichilia Shao, amesema petroli ina kemikali mbalimbali, zikiwamo benzene na toluene, ambazo zinaweza kuathiri viungo muhimu vya mwili kama ubongo, moyo, mapafu, ini na figo, hasa mtu anapokabiliwa na kemikali hizo kwa kiwango kikubwa au kwa muda mrefu.

Amesema madhara yanayoweza kujitokeza ni pamoja na maumivu ya kichwa, kizunguzungu, kupoteza kumbukumbu, kushindwa kuzingatia na kuharibika kwa mfumo wa fahamu.

Mmoja wa waraibu wa uvutaji wa harufu ya petrol, akionyesha mbinu wanayotumia kwa kijificha wakati wanapovuta.

Akizungumzia madhara kwa moyo, Dk Shao amesema kuvuta mvuke wa petroli kunaweza kuvuruga mpangilio wa mapigo ya moyo na kusababisha moyo kusimama ghafla, hali inayoweza kusababisha kifo.

Amesema kemikali zilizomo kwenye petroli zinaweza pia kuwasha njia za hewa na kusababisha kikohozi na matatizo ya kupumua. Petroli inapoingia kwenye mapafu, inaweza kusababisha madhara makubwa, ikiwamo kuvimba kwa mapafu.

“Matumizi ya muda mrefu au kuathiriwa na kemikali hizo kwa kiwango kikubwa pia kunaweza kuathiri ini na figo, pamoja na kuvuruga uwiano wa madini muhimu mwilini,” amesema Dk Shao.

Kwa upande wa afya ya akili, Dk Shao amesema tabia ya kuvuta harufu ya petroli inaweza kuhusishwa na mabadiliko ya tabia, hasira, kushindwa kufanya maamuzi sahihi na utegemezi wa kunusa petroli.

Aidha, amesema kuathiriwa na kemikali hizo kwa kiwango kikubwa wakati wa ujauzito kunaweza kuhatarisha afya na ukuaji wa mtoto aliye tumboni.

Post navigation

Previous: Tanzania: Four Clubs, One Mission – Tanzania Must Raise Bar

Next: VETA Moshi Embarks on Shift to Clean Energy for Cooking

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Wahitimu wagombania msichana, mmoja atuhumiwa kumuua mwenzake

2 mins read

Wahitimu wagombania msichana, mmoja atuhumiwa kumuua mwenzake

Habari za Dharura

October 30, 2026 Admin0

Kilomita 59 za lami zajengwa Mji wa Serikali Mtumba

1 min read

Kilomita 59 za lami zajengwa Mji wa Serikali Mtumba

Habari za Dharura

October 30, 2026 Admin0

Kutoka wazo hadi uhalisia, safari ya miaka 53 yatimia

6 mins read

Kutoka wazo hadi uhalisia, safari ya miaka 53 yatimia

Habari za Dharura

October 30, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.