Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

NIKWAMBIE MAMA: Bima ya afya kwa wote isimwache mtu

4 mins read

NIKWAMBIE MAMA: Bima ya afya kwa wote isimwache mtu

Habari za Dharura

October 28, 2026 Admin0

Katika kujihadhari na maafa ya mvua za juu ya wastani na dhoruba ya El-Nino, Mamlaka ya Hali ya Hewa pamoja na viongozi wake wametushauri tuweke akiba ya chakula. Katika hali ya kawaida, wakazi wa uswahilini tunafikiria kununua sukari, mchele, unga, na maharagwe japo kwa kilo tano-tano na kuhifadhi ndani. Lakini mawazo hayo yanakatika mara moja tunapofikiria urefu wa tatizo na wepesi wa mifuko yetu.

Nilipata kusikia zamani kuwa ukilia njaa kwenye mitaa ya London, swali la kwanza utakaloulizwa ni kwa nini una njaa. Utajibu kuwa hujala tangu jana. Badala ya kukusaidia, watu watakulaani kwa kukosa umakini. Unawezaje kusahau kula? Kula ni jambo muhimu kama kupumua. Lakini kwenye nchi zetu ukilia njaa ni sawa unalilia jamvi msibani ukachezee karata. Wanaokusikiliza wana majanga makubwa kuliko hiyo njaa yako.

Wa kwanza anatoka hospitali ambako mtoto wake ameshindwa kuhudumiwa. Anahitaji shilingi laki moja ya vipimo, baada ya hapo atahitaji Sh80,000 ya dawa. Ukute mtu huyo kashindwa kuamsha bodaboda yake kwa sababu ya hali ya mtoto, sasa anachapa mwendo kuwahi kijiweni labda ataambulia chochote. Wa pili kashindwa hata kuacha maandazi ya watoto kunywea chai, naye anawahi maskani kuwasha dira.

Kutokana na matibabu kuwa mzigo mkubwa kwa wananchi, niwape kongole kwa uamuzi sahihi wa kuvumbua mpango wa Bima ya Afya kwa Wote. Mpango huu utaokoa maisha mengi sana, ukizingatia mtu huweza kupoteza maisha baada ya kusikia gharama za matibabu. Mgonjwa alikuwa akifichwa taarifa za ugonjwa wake kwa kuhofia kukata moto. Ndio maana magonjwa ya moyo, figo, maini na kansa yalitambulika kama “ya matajiri tu”. Masikini aliumwa ngiri na kichocho.

Nadhani ninaeleweka vizuri ninaposema haya, kwamba ni Watanzania wachache wanaomudu kuweka akiba. Maisha yetu ni ya kutoka kila siku, kutafuta ugali wa siku hiyo tu. Mlo wa kesho ulitegemeana na jinsi kutakavyopambazuka. Ni wenzetu wachache sana wana uwezo wa kuhifadhi mboga kwenye jokofu na viroba vya chakula kwenye stoo. Wachache tuliwahi kupitia neema hizo katika nyakati zilizopita, ila kwa sasa mambo si mambo.

Nimemsikia Mkuu wa Mkoa wa Dar es Salaam akitangaza awamu ya pili ya uzinduzi wa Bima ya Afya. Amesema kuwa zoezi litafanyika nyumba kwa nyumba ili kufanikisha mpango huo. Imekaa vizuri sana, maana kutokana na maisha yetu si ajabu watu tutakumbuka mashuka kungali kumeshapambazuka. Lakini ingawaje mimi si mnajimu napenda kumtabiria hali watakayokutana nayo watakapopita uswahilini.

Katika hali ya kawaida, mtu yeyote ni lazima aweke vipaumbele kwenye mambo ya msingi. Iwe una pesa au hunazo, ukikosa moja ya vipaumbele hivi utakuwa unajiweka matatani. Vipaumbele hivi ni kula, kulala, kusoma na kutibiwa. Utashangaa kuna jambo moja la msingi nimelipotezea kwani nikiliweka sasa, nitaonekana “hamnazo”. Hili linahitaji ufafanuzi wa kina ili stori yetu isije ikavurugika.

Tuendelee: Kwenye maisha yetu, mtu anakurupuka alfajiri kwenda kutafuta maandazi ya kifungua kinywa. Maana yake kipaumbele cha kula hakiko sawa. Mtu huyohuyo ana deni la malimbikizo ya kodi ya nyumba, hapo napo kipaumbele cha kulala kipo hatarini. Watoto wamesimamishwa kusoma kwa madeni ya ada, kipaumbele cha tatu kimefeli. Hiki cha kutibiwa tunakizimia data, tunajisahaulisha maradhi ili tuendelee kutafuta hela ya kula.

Kipaumbele kingine tunachokifumbia macho ni starehe. Nilijua tu, kukitaja hiki ni lazima uwe na akili za mwendawazimu. Lakini starehe sio kulewa, ni kuwatoa watoto na mama yao ufukweni au kubembea. Utaratibu huu ni wa lazima kwani unaepusha hasira, msongo na maumivu wanayopitia maishani. Baada ya mwezi mzima wa ndondo miksa kauzu, wanabaki na uhakika wa Jumapili moja kula kwenye Hoteli ya japo nyota moja.

Jambo nililotaka kumdokeza Mkuu wa Mkoa ni hili: Asilimia kubwa ya wakazi wa uswahilini watakosa shilingi laki moja na nusu. Huku tunajitahidi sana kutunza pesa kwa ajili ya mambo muhimu. Lakini pesa yetu inakutana na majanga kila baada ya muda mfupi. Fikiria mtu ana mwezi mzima wa kutafuta kodi, angesevu buku tu kwa siku, angekuwa na kodi ya mwezi mzima. Lakini kuna majanga ya “mtoto kameza pasi” au “babu kameza shoka” yanamsubiri.

Tunafurahi kuwa kuna mpango kuwasaidia wale wasiojiweza kabisa. Lakini kuna tofauti ndogo sana kati ya hao na sisi “papatu-papatu”. Jambo la kufurahisha ni kwamba kwanza hatukubali kuitwa “wasiojiweza”. Sisi tunajivunia kulipa kodi na kuchangia maendeleo. Basi Serikali ingelikuwa na mpango maalum wa kuipata fedha yetu. Namaanisha kuwa tusishindwe kuitoa, lakini tusife kwa presha baada ya kuitoa.

Pengine mwananchi angewekeza hata kwa miezi mitatu ili kutimiza kiwango kile. Serikali ingetumia mfumo uliotumika katika urasimishaji wa maeneo ya kuishi miaka michache iliyopita. Ninaamini hakuna ambaye angebaki nyuma ya mpango huu mahususi. Lakini kumtoa mwamba “Laki-Unusu kisu kimoja”, kunataka kulia na kusaga meno. Utashangaa nikikwambia mtu ananunua sukari robo kila siku, wakati anajua kuwa akinunua kiroba anapata unafuu wa bei.

Post navigation

Previous: Tanzanian Sinks $56.2m in Equipment for Upgrading 188km Tanga-Ruvu MGR Line

Next: FYATU MFYATUZI: Mie mtakatifu, ikuluni si pango la wevi

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Wadau: Wazazi, walezi wawasikilize watoto badala ya kuwahukumu

5 mins read

Wadau: Wazazi, walezi wawasikilize watoto badala ya kuwahukumu

Habari za Dharura

October 28, 2026 Admin0

Tanzania seeks to prepare locals for oil, gas opportunities

3 mins read

Tanzania seeks to prepare locals for oil, gas opportunities

Habari za Dharura

October 28, 2026 Admin0

Tshisekedi aomba kuungwa mkono kumkabili Kabila

3 mins read

Tshisekedi aomba kuungwa mkono kumkabili Kabila

Habari za Dharura

October 28, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.