Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Gwajima aonya wanaosambaza video za wahitimu mitandaoni

5 mins read

Gwajima aonya wanaosambaza video za wahitimu mitandaoni

Habari za Dharura

October 27, 2026 Admin0

Dar es Salaam. Waziri wa Maendeleo ya Jamii, Jinsia, Wanawake na Makundi Maalumu, Dk Dorothy Gwajima, amewaonya watu wanaosambaza video na picha za wahitimu wa Shule ya Sekondari Aboud Jumbe, akisema vitendo hivyo ni udhalilishaji wa watoto na vinaweza kuwafanya wahusika kuchukuliwa hatua za kisheria.

Gwajima ametoa onyo hilo kupitia ukurasa wake wa Instagram leo Jumanne, Oktoba 27, 2026, kufuatia kuendelea kusambazwa kwa video za mabinti hao walioibua mjadala mitandaoni baada ya kujinadi kuwa wamehitimu masomo na sasa wanaingia mtaani kufanya vitendo vya hovyo.

Amesema baada ya tukio hilo, Mkuu wa Wilaya ya Kigamboni, Mikaya Dalmia aliwaita wanafunzi hao, wazazi wao na walimu katika kikao kilichofanyika Oktoba 26, 2026, kisha wanafunzi walikiri makosa yao na kuomba msamaha.

Hata hivyo, amesema baadhi ya watu wazima wameendelea kusambaza video na picha za wanafunzi hao, kunukuu kauli zao na kuzisambaza mitandaoni.

Amesema wengine wamefikia hatua ya kutengeneza stika zenye kauli hizo na kuzibandika katika maeneo mbalimbali, yakiwamo ya vyombo vya usafiri.

Gwajima amesema vitendo hivyo ni udhalilishaji wa watoto, akisisitiza kuwa makosa waliyofanya hayapaswi kutumiwa na watu wazima kama fursa ya kuwakejeli au kusambaza maudhui yanayoweza kuathiri maisha yao ya baadaye.

“Kifupi, huu ni udhalilishaji na kosa kisheria dhidi ya watoto ambao tabia zao hizo ni matokeo ya uwajibikaji mbovu wa dunia ya watu wazima kwenye kulea na kukuza watoto tunaojaliwa,” ameandika.

Amesema tayari amewasilisha vielelezo vinavyohusu baadhi ya watu wanaodaiwa kuhusika na udhalilishaji huo kwa mawaziri wa kisekta ili hatua stahiki zichukuliwe kupitia vyombo vyao vya kisheria.

“Na wengine wote acheni kuendelea kuwadhalilisha watoto hawa na wengine wote,” ameonya.

Waziri huyo amesema malezi ya watoto ni jukumu la jamii nzima, hivyo kila mmoja anapaswa kushiriki katika kuwalea na kuwaongoza badala ya kutumia makosa yao kama sababu ya kuwafedhehesha.

“Naonya na kuagiza kwamba malezi ya watoto yanatuhitaji sisi sote kama jamii inayowazunguka watoto waliozaliwa na wazazi mbalimbali na siyo kutumia fursa ya visa vya ujinga wa watoto kuendelea kuwadhalilisha kwani kuna watu watajikuta gerezani kwa mujibu wa Sheria ya Mtoto, tubadilike na tuwalee watoto wetu kama jamii moja,” amesema Dk Gwajima.

Hata hivyo, amewakumbusha watoto kuwa nao wana wajibu wa kusikiliza na kuzingatia malezi wanayopewa katika hatua mbalimbali za makuzi yao, akiwataka kuepuka kuiga vitendo visivyofaa kutoka kwa watu wengine.

Amesema watoto wanaweza kuchukuliwa hatua za kisheria wanapovuruga utulivu katika jamii, huku akiwataka kujiepusha na vitendo vinavyoweza kudhalilisha utu wao na kuhatarisha maendeleo na ustawi wao.

Hata hivyo, wahitimu hao (majina yao yanahifadhiwa kutokana na kutotimiza umri wa miaka 18) wameeleza masikitiko yao kuhusu kauli hizo, wakikiri kuwa vitendo vyao vimeidhalilisha shule yao na kuibua maswali kuhusu malezi wanayopata nyumbani na shuleni.

Mmoja wa wanafunzi hao amesema kauli walizotoa zimeacha taswira kwamba wazazi na walimu wao hawawapi malezi yanayostahili, hivyo ameiomba jamii iwasamehe kwa makosa waliyoyafanya.

Mwanafunzi mwingine ameomba msamaha kwa walimu, Serikali na uongozi wa shule hiyo, akisema wanatambua kuwa walifanya vitendo vya utovu wa nidhamu vilivyoichafua taswira ya shule yao.

“Tumeidhalilisha sana shule yetu, hatukujua kitakachotokea, tunaomba mtusamehe,” amesema.

Mwanafunzi wa tatu ameomba radhi kwa makosa waliyofanya wakiwa mtaani, huku akiwataka vijana wengine wa rika lao kujiepusha na vitendo kama walivyofanya wao.

“Tunaomba msamaha kwa walimu na wazazi, tunajua tumekosea lakini hatutarudia tena, na Tanzania nzima mtusamehe, tunajua mitandao ni chombo rahisi ambacho kinafikisha ujumbe, tunaomba mtusamehe sana,” amesema.

Hatua hiyo imekuja baada ya video zinazowaonesha wahitimu hao kusambaa kwenye mitandao ya kijamii na kukosolewa na baadhi ya watumiaji wa mitandao hiyo.

Oktoba 25, 2026, Dk Gwajima alikemea mwenendo wa baadhi ya wanafunzi wanaotumia vibaya mitandao ya kijamii, akieleza kuwa vitendo vyao ni ujinga.

Kupitia ukurasa wake rasmi wa Instagram, Dk Gwajima alieleza kusikitishwa kwake na video zilizosambaa zikiwaonyesha mabinti hao, huku akitaka kufahamu shule wanazosoma ili hatua stahiki zichukuliwe kwa kushirikiana na walimu na wazazi wao.

“Haya, hawa ni wa shule gani ili tutete jambo na walimu, tufahamu wazazi wao wako wapi ili tuwafikie na kushirikiana kuwakomboa mabinti hawa kwenye fikra hizi mbaya kwa elimu, malezi na makuzi endelevu maana naona mabinti hawa wanajiandalia ajali ya maisha yao bila bima,” alisema Dk Gwajima.

“Kifupi huu ni ujinga na ni huzuni sana mabinti kama hawa kugeuza ujinga kuwa mtaji wa maendeleo na ustawi.”

Akizungumza katika kikao kilichofanyika Jumatatu, Oktoba 26, 2026, Dalmia ambaye Mkuu wa Wilaya ya Kigamboni, alisema wamekutana na wahitimu hao, wazazi na walimu kwa lengo la kuwakumbusha wazazi wajibu wao katika malezi na kuwasaidia vijana kujifunza kutokana na kilichotokea.

“Tunapaswa kutoa muda wetu kwa malezi, kujua mtoto anapotoka nyumbani anaenda wapi na anakutana na nani, pamoja na kufuatilia maendeleo yake ya shule,” alisema Dalmia.

Alisema mitandao ya kijamii huhifadhi kumbukumbu za mambo yanayochapishwa, hivyo vijana wanapaswa kuzingatia athari za kauli na vitendo vyao kwa maisha yao ya baadaye, ikiwamo wanapotafuta ajira au kujenga mahusiano ya kibiashara.

Dalmia alisema jukumu la malezi huanzia katika familia na kuendelea shuleni na katika jamii, akiwataka wazazi kushirikiana na walimu kufuatilia tabia, mahitaji na changamoto zinazowakabili watoto wao.

Alifafanua kuwa lengo la hatua zilizochukuliwa si kuwaadhibu vijana pekee, bali pia kuwaelimisha na kuwaongoza ili wajifunze kutokana na kilichotokea na kuepuka kurudia makosa hayo.

Aliwataka wahitimu hao kutumia kipindi wanachosubiri matokeo ya mitihani kwa shughuli zenye manufaa, ikiwamo kujifunza matumizi ya kompyuta, kushiriki shughuli za kijamii na kujifunza stadi za kujitegemea.

Post navigation

Previous: Chadema, Magereza zatofautiana kuhusu mgomo wa kula kwa Lissu

Next: Chadema yamwandikia Ruto kuhusu Mwaipaya

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Bibi Lotuno, miaka 104 ya maisha vizazi vinne vya familia

4 mins read

Bibi Lotuno, miaka 104 ya maisha vizazi vinne vya familia

Habari za Dharura

October 27, 2026 Admin0

Rais Samia apongezwa kufanikisha mkutano wa IPU Arusha

3 mins read

Rais Samia apongezwa kufanikisha mkutano wa IPU Arusha

Habari za Dharura

October 27, 2026 Admin0

Chadema yamwandikia Ruto kuhusu Mwaipaya

3 mins read

Chadema yamwandikia Ruto kuhusu Mwaipaya

Habari za Dharura

October 27, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.