Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Muhongo aonesha njia kukuza uchumi

4 mins read

Muhongo aonesha njia kukuza uchumi

Habari za Dharura

October 30, 2026 Admin0

Dodoma. Mbunge wa Musoma Vijijini, Profesa Sospiter Muhongo ameishauri Serikali kuangalia vyanzo vingine vya kukuza uchumi wa Tanzania badala ya kutegemea tozo, akisema nchi zinahitaji kuwekeza katika uzalishaji na kuongeza bidhaa zinazouzwa nje ili kukuza uchumi.

Profesa Muhongo ametoa ushauri huo leo Alhamisi, Oktoba 29, 2026, wakati akichangia mpango wa Serikali wa mwaka wa fedha 2027/28.

Amesema hakuna nchi duniani iliyofanikiwa kukuza uchumi wake kwa kutegemea tozo, akisisitiza umuhimu wa kuimarisha sekta za uzalishaji na kuongeza mauzo ya bidhaa nje ya nchi.

Kauli yake inakuja wakati wadau mbalimbali wakiendelea kueleza hofu kuhusu kupanda kwa bei za bidhaa, hali inayohusishwa na wingi wa tozo zinazotozwa kwenye bidhaa hizo.

Akichangia mpango huo, Profesa Muhongo ameitaka Serikali kuacha kutegemea tozo kama njia kuu ya kukuza uchumi, ingawa amekiri kuwa utekelezaji wa mipango ya maendeleo, ikiwamo ujenzi wa barabara na upatikanaji wa maji, unahitaji fedha.

Waziri huyo wa zamani wa nishati na madini ametumia takwimu kueleza sababu zinazochangia ukuaji wa uchumi kuwa wa polepole, akisisitiza kuwa ongezeko la idadi ya watu linapaswa kwenda sambamba na ukuaji wa uchumi.

Amesema kilimo ni miongoni mwa sekta zenye uwezo mkubwa wa kukuza uchumi na kuishauri tume kuja na mkakati wa kuhakikisha sekta hiyo inachangia asilimia 10 ya Pato la Taifa (GDP), akieleza kuwa lengo hilo linawezekana.

“Kingine nashauri kuwa gesi asilia na viwanda vyake vichangie asilimia 25 ya pato la Taifa, madini na viwanda vichangie asilimia 20, utalii na viwanda asilimia 15 na uvuvi pamoja na ufugaji wake vichangie asilimia tano,” amesema.

Profesa Muhongo ametaja bidhaa zinazouzwa nje ya nchi kuwa miongoni mwa vichocheo vinavyoweza kukuza uchumi kwa haraka, akisisitiza kuwa bidhaa hizo zinapaswa kuwa bora na zilizoongezwa thamani badala ya kuuza malighafi pekee.

Amesema Tanzania inapaswa kujifunza kutoka China, ambayo imepiga hatua kiuchumi kupitia uzalishaji na mauzo ya bidhaa zake katika masoko ya kimataifa.

Hii si mara ya kwanza kwa Profesa Muhongo kuzungumzia umuhimu wa kutumia rasilimali za madini kukuza uchumi wa Taifa.

Amekuwa akisisitiza kuwa, Tanzania inaweza kunufaika zaidi kwa kuongeza thamani ya madini yanayotumika kutengeneza bidhaa mbalimbali, ikiwamo betri, simu na dawa.

Mbunge wa Maswa Magharibi, Mashimba Ndaki amesema Serikali inapaswa kukubali kubana matumizi ili fedha zinazokusanywa zielekezwe kwenye shughuli za msingi za maendeleo.

Ndaki ambaye ni Mwenyekiti wa Kamati ya Bunge ya Bajeti, amesema bado kuna changamoto katika ukusanyaji wa mapato na uwiano wake na matumizi ya Serikali.

“Lazima Serikali ikubali kubana matumizi, kama ni kuhamia Dodoma, basi wote waje. Isiwe taasisi moja kuwa na ofisi mbili kati ya Dodoma na Dar es Salaam, ambayo yanakuwa ni matumizi mabaya ya mali ya umma,” amesema.

Mbunge wa Mbulu Vijijini, Dk Emmanuel Nuwasa amesema mipango ya Serikali ni mizuri, lakini matumizi mabaya ya fedha za umma na matumizi yasiyo na tija ni miongoni mwa vikwazo vinavyozuia maendeleo.

Ametoa mfano wa matengenezo ya barabara, akisema katika baadhi ya maeneo yenye uharibifu mdogo, badala ya kurekebisha sehemu zilizoharibika na kuelekeza fedha zilizobaki kwenye maeneo mengine yenye uhitaji, wataalamu hulazimisha kukwanguliwa kwa barabara nzima.

Amesema utaratibu huo unaweza kusababisha matumizi yasiyo ya lazima ya fedha za umma na kuchochea vitendo vya rushwa.

Mbunge wa Mvomero, Sara Msafiri amezungumzia urasimu katika utekelezaji wa miradi ya maendeleo, licha ya Serikali kukusanya mapato.

Amesema urasimu huo unachangia baadhi ya maamuzi kushindwa kufikia hatua ya utekelezaji, akitolea mfano hoja ya Bunge kuhusu kuifanya Wakala wa Barabara Tanzania (Tanroads) kuwa mamlaka kamili.

Mbunge wa Kongwa, Isaya Mngulumi ameitaka Serikali kuimarisha sekta ya kilimo kwa kuwasaidia wakulima wanaokabiliwa na gharama kubwa za uzalishaji, kipato kidogo na changamoto za upatikanaji wa masoko.

Mngulumi amesema gharama zinazotumiwa na wakulima katika uzalishaji, ikiwamo kununua mashine za kilimo na mbegu, hazilingani na kipato wanachopata wanapouza mazao yao sokoni.

Ameiomba Serikali kulitazama kwa kina suala hilo ili kuboresha hali ya wakulima na kuhakikisha wanapata manufaa yanayolingana na gharama wanazotumia kuzalisha.

Hoja hiyo iliungwa mkono na Mbunge wa Bumburi, Ramadhan Singano aliyeitaka Serikali kuongeza uwekezaji katika kilimo, hususan sekta ya umwagiliaji ili kuimarisha uzalishaji na kuongeza tija kwa wakulima.

Post navigation

Previous: Tanzania-Angola’s Ties See a New Dawn in Dar-Luanda Directs Flights

Next: Hivi ni nani anayehusika na masuala ya wastaafu?

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Zanzibar inavyoelemewa na mzigo wa taka, yazalisha tani 663 kwa siku

7 mins read

Zanzibar inavyoelemewa na mzigo wa taka, yazalisha tani 663 kwa siku

Habari za Dharura

October 31, 2026 Admin0

Simulizi ya mtoto aliyetoa maoni mabadiliko Katiba, sasa mfanyabiashara

7 mins read

Simulizi ya mtoto aliyetoa maoni mabadiliko Katiba, sasa mfanyabiashara

Habari za Dharura

October 31, 2026 Admin0

Kenyan court orders police to produce missing Tanzanian activist dead or alive

2 mins read

Kenyan court orders police to produce missing Tanzanian activist dead or alive

Habari za Dharura

October 31, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.