Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Kutoka wazo hadi uhalisia, safari ya miaka 53 yatimia

6 mins read

Kutoka wazo hadi uhalisia, safari ya miaka 53 yatimia

Habari za Dharura

October 30, 2026 Admin0

Dodoma/Dar. Baada ya miaka 53 tangu Hayati Baba wa Taifa, Mwalimu Julius Nyerere alipotoa wazo la kuhamishia makao makuu ya Serikali Dodoma mwaka 1973, hatimaye azma hiyo imefikia hatua muhimu baada ya kuzinduliwa rasmi kwa majengo ya wizara, taasisi za Serikali na miundombinu ya Mji wa Serikali wa Mtumba.

Uzinduzi huo uliofanyika leo Ijumaa, Oktoba 30, 2026, umefanywa na Rais Samia Suluhu Hassan akiwa na mgeni wake, Rais wa Angola, João Lourenço, ukiashiria hatua nyingine katika safari ya kuifanya Dodoma kuwa kitovu cha shughuli za kiutawala na kisiasa nchini.

Samia Suluhu Hassan, Rais wa Jamhuri ya Muungano wa Tanzania akikata utepe pamoja na mgeni wake João Manuel Conçalves Lourenço, Rais wa Jamhuri ya Angola kuashiria ufunguzi wa majengo ya ofisi za wizara na taasisi za serikali katika Mji wa Serikali Mtumba Jijini Dodoma, Oktoba 30, 2026.

Wazo la kuhamishia makao makuu ya Serikali Dodoma liliasisiwa na Mwalimu Nyerere mwaka 1973, akilenga kusogeza shughuli za kiutawala katikati ya nchi.

Hata hivyo, utekelezaji wake ulichukua muda mrefu kutokana na changamoto mbalimbali, huku shughuli nyingi za Serikali zikiendelea kufanyika Dar es Salaam.

Mwaka 2016, Serikali ya Awamu ya Tano chini ya Hayati Rais John Magufuli ilichukua hatua za kuharakisha utekelezaji wa azma hiyo kwa kuhamishia shughuli za Serikali Dodoma.

Hatua hiyo ilifuatiwa na kuanza kwa ujenzi wa Mji wa Serikali wa Mtumba mwaka 2018, ukiwa na lengo la kukusanya wizara na taasisi za Serikali katika eneo moja.

Mwaka 2021, Rais Samia alipoingia madarakani, alikuta mradi huo ukiwa na majengo ya awali ya kujishikiza, lakini akaamua kuendeleza kazi iliyokuwa imeanza kwa kuongeza kasi ya ujenzi wa majengo ya kudumu na miundombinu muhimu.

Akizungumza wakati wa uzinduzi huo, Rais Samia amesema Serikali iliamua kuendeleza mradi kwa kujenga majengo ya kudumu ya ghorofa, barabara za lami na miundombinu mingine wezeshi ili kuweka mazingira bora na ya kisasa ya utendaji.

“Tuliamua kuendeleza mradi wa ujenzi huu wa majengo ya Serikali kwa kujenga majengo ya kudumu ya ghorofa, barabara za lami na miundombinu mingine wezeshi,” amesema.

Ameongeza: “Namshukuru Mungu kwa kutuwezesha kutimiza tuliyoyakusudia, hakika tunapaswa kujipongeza sote Watanzania kwa mafanikio makubwa haya.”

Teknolojia kupunguza urasimu

Mbali na uzinduzi wa majengo hayo, Rais Samia ameitaka Serikali kuhakikisha mifumo ya Teknolojia ya Habari na Mawasiliano (Tehama) iliyowekwa katika Mji wa Serikali wa Mtumba inatumika kuongeza tija na kurahisisha utoaji wa huduma kwa wananchi.

Amesema wananchi hawapaswi kutumia muda na fedha kusafiri kutoka mikoa ya mbali kwenda Dodoma kufuatilia huduma zinazoweza kupatikana katika maeneo wanayoishi.

“Mwananchi kutoka mikoa ya Rukwa, Kigoma, Mtwara asitumie muda na fedha nyingi kuja (Dodoma) kufuatilia jambo lake ambalo lingeweza kupatiwa ufumbuzi alipo,” amesema.

Amesisitiza umuhimu wa kuunganisha mifumo ya Tehama ya taasisi mbalimbali za Serikali ili taarifa zinazopokelewa na kuchakatwa katika taasisi moja ziweze kupatikana kwa urahisi katika nyingine.

Miundombinu ya kisasa Mtumba

Mji wa Serikali wa Mtumba umejengwa kwa fedha za ndani na una majengo ya wizara na taasisi mbalimbali za Serikali pamoja na miundombinu inayolenga kurahisisha shughuli za kiutawala.

Miongoni mwa huduma zilizowekwa ni kituo maalumu cha kuchajia magari ya Serikali yanayotumia gesi, magari mengine madogo na pikipiki, pamoja na vituo 59 vya mabasi.

Pia, mifumo ya umeme na huduma za kidijitali imepitishwa chini ya ardhi ili kuboresha muonekano na usalama wa eneo hilo.

Muonekano wa majengo ya ofisi za wizara na taasisi za serikali pamoja na barabara katika Mji wa Serikali Mtumba jijini Dodoma.

Akizungumzia miundombinu ya usafiri, Waziri wa Nchi, Ofisi ya Waziri Mkuu (Tamisemi), Profesa Riziki Shemdoe, amesema jumla ya kilomita 59.1 za barabara za lami zimejengwa.

Amesema ujenzi huo umehusisha pia njia za watembea kwa miguu zenye urefu wa kilomita 59.1 na njia za waendesha baiskeli zenye urefu kama huo.

“Barabara hizo zimewekewa taa 1,635, huku baadhi zikipewa majina ya marais wastaafu, ikiwamo Barabara ya Julius Nyerere,” amesema.

Kwa upande mwingine, Mji wa Serikali umetengwa kwa ajili ya ofisi za balozi za nchi mbalimbali zilizopo nchini, ambapo kila nchi imepewa eneo la kujenga ofisi zake.

Waziri wa Nchi, Ofisi ya Waziri Mkuu (Mipango na Uwekezaji), Profesa Kitila Mkumbo, amesema Uganda ni miongoni mwa nchi ambazo tayari zimeanza ujenzi wa jengo la ubalozi wake katika eneo hilo.

Sh700 bilioni za ujenzi

Msemaji wa Serikali, Gerson Msigwa, amesema Serikali imewekeza takribani Sh700 bilioni katika ujenzi wa majengo na miundombinu ya Mji wa Serikali wa Mtumba.

Amesema zaidi ya mataifa 10 yameitembelea Tanzania kwa lengo la kujifunza kuhusu ujenzi na uendeshaji wa mji huo.

Msigwa ameongeza kuwa miundombinu iliyojengwa Mtumba ina uwezo wa kuwa kivutio cha utalii jijini Dodoma.

Uzinduzi huo unaweka alama ya hatua muhimu katika safari ya kutimiza wazo lililoanzishwa na Nyerere mwaka 1973, likaharakishwa chini ya uongozi wa Magufuli na kuendelezwa hadi hatua ya sasa chini ya Rais Samia.

UTILITY:

Asili ya jina Mtumba

Mtumba ni jina linalotokana na mti unaotumiwa na wenyeji wa Dodoma, Wagogo, kwa matumizi mbalimbali, ikiwemo kufukizia maziwa ili kuongeza ladha, mizizi yake kuchemshwa na kunywewa na wanawake wanaonyonyesha, huku matunda yake yakitumika kama chakula.

Eneo hilo lipo takribani kilomita 19 mashariki mwa Jiji la Dodoma, karibu na barabara ya Dodoma-Morogoro na makutano ya barabara ya mzunguko.

Eneo lililotumika kujenga mji huo lilichukuliwa kutoka kwa wananchi, wengi wao wakiwa wakulima wa Vijiji vya Mahomamakulu na Mtumba.

Ujenzi wa Mji wa Serikali ulianza Novemba 28, 2018 kwa awamu ya kwanza iliyogharimu Sh39.39 bilioni, ambapo yalijengwa majengo ya muda. Baadaye, Serikali ilitenga Sh940.8 bilioni kwa awamu ya pili, ambayo imefikia asilimia 99 ya utekelezaji.

Uzinduzi wa majengo 37 ya Mtumba unaenda sambamba na majengo mengine 35 yaliyojengwa nje ya eneo la mji huo pamoja na kilomita 57.1 za barabara zilizogharimu zaidi ya Sh110.5 bilioni.

Imeandikwa na Bakari Kiango, Elizabeth Edward na Habel Chidawali

Post navigation

Previous: Dhamira ya CRDB kuifikisha Tanzania uchumi wa Dola 1 trilioni kupitia kilimo, uvuvi na mifugo

Next: Kilomita 59 za lami zajengwa Mji wa Serikali Mtumba

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Wahitimu wagombania msichana, mmoja atuhumiwa kumuua mwenzake

2 mins read

Wahitimu wagombania msichana, mmoja atuhumiwa kumuua mwenzake

Habari za Dharura

October 30, 2026 Admin0

Kilomita 59 za lami zajengwa Mji wa Serikali Mtumba

1 min read

Kilomita 59 za lami zajengwa Mji wa Serikali Mtumba

Habari za Dharura

October 30, 2026 Admin0

Dhamira ya CRDB kuifikisha Tanzania uchumi wa Dola 1 trilioni kupitia kilimo, uvuvi na mifugo

8 mins read

Dhamira ya CRDB kuifikisha Tanzania uchumi wa Dola 1 trilioni kupitia kilimo, uvuvi na mifugo

Habari za Dharura

October 30, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.