Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Trafiki asimulia madai kupigwa na Dk Kahyoza wa Muhimbili

3 mins read

Trafiki asimulia madai kupigwa na Dk Kahyoza wa Muhimbili

Habari za Dharura

October 27, 2026 Admin0

Dar es Salaam. Askari wa Usalama Barabarani, F.8886 Sajenti Andrew, amesimulia mahakamani namna alivyoshambuliwa kwa ngumi usoni na daktari bingwa wa magonjwa ya ndani wa Hospitali ya Taifa ya Muhimbili (MNH), tawi la Mlonganzila, Dk Conrad Kahyoza, wakati akitekeleza majukumu yake.

Sajenti Andrew ametoa ushahidi huo Jumatatu, Oktoba 26, 2026, katika Mahakama ya Wilaya ya Kinondoni, Dar es Salaam, kwenye kesi ya jinai inayomkabili daktari huyo.

Katika kesi hiyo inayosikilizwa na Hakimu Mfawidhi wa mahakama hiyo, Hakimu Mkazi Jacqueline Rugemalira, Dk Kahyoza anakabiliwa na shtaka moja la shambulio na kumzuia mwajiriwa kutekeleza amri halali, kinyume na kifungu cha 243(d) cha Sheria ya Kanuni ya Adhabu, Toleo la mwaka 2023.

Dk Kahyoza alipandishwa kizimbani na kusomewa shtaka hilo Septemba 10, 2026, akidaiwa kutenda kosa hilo Septemba 8, saa 1:30 asubuhi, katika Barabara ya Bagamoyo, eneo la Makongo, Dar es Salaam.

Akiongozwa na Wakili wa Serikali, Abdul-Majid Mtukusye leo Jumatatu, Oktoba 26, 2026, Sajenti Andrew, ambaye ni shahidi wa kwanza wa upande wa Jamhuri, ameiambia mahakama kuwa siku ya tukio alikuwa akiongoza magari katika Barabara ya Bagamoyo, eneo la Makongo Lugalo, wilayani Kinondoni.

Amesema akiwa kazini asubuhi hiyo, alisimamisha magari matatu yaliyokuwa yakitumia barabara ya huduma (service road), likiwamo gari lililokuwa likiendeshwa na mshtakiwa.

Shahidi huyo amesema aliwaomba madereva leseni zao na kuanza kuwaandikia faini. Hata hivyo, alipomfikia Dk Kahyoza na kumtaka aonyeshe leseni yake, alikataa na badala yake kumshambulia.

“Mshtakiwa alinipiga ngumi usoni hadi askari wengine walipofika eneo hilo na kutuamulia. Baadaye, gari la Polisi lilifika na kutuchukua hadi Kituo cha Polisi Oysterbay, ambako nilipewa PF3 kwa ajili ya kupata matibabu,” amedai askari huyo.

Shahidi wa pili, Ramadhan Ndege (39), dereva wa magari ya kusafirisha abiria na mizigo katika Stendi ya Makumbusho, ameiambia mahakama kuwa siku ya tukio alimwona mtu aliyevaa nguo za kiraia akimshambulia askari wa usalama barabarani.

Akiongozwa pia na Wakili Mtukusye, Ndege amesema tukio hilo lilitokea katika barabara ya huduma kandokando ya Barabara ya Bagamoyo, eneo la Makongo, wakati barabara hiyo ikiwa na foleni ya magari.

Amesema siku hiyo alikuwa akitokea Mbezi Beach, Tangibovu, kuelekea kituoni kwake Makumbusho kwa kutumia pikipiki, alipowaona askari watatu wakiwa mbele yake katika barabara hiyo.

Alipoelekeza macho eneo la tukio, amesema alimwona mtu aliyevaa nguo za kawaida akiwa juu ya askari aliyevaa sare za kazi, aliyekuwa ameanguka chini huku akipigwa ngumi usoni.

Kwa mujibu wa shahidi huyo, muda mfupi baadaye askari wengine wawili waliingilia kati na kuamulia ugomvi huo kabla ya gari la Polisi kufika na kuwachukua wote.

Ndege amesema baada ya kuendelea na shughuli zake, aliamua kwenda Kituo cha Polisi Oysterbay kufuatilia kilichotokea.

Hata hivyo, ameeleza kuwa hamfahamu mshtakiwa na hakuweza kumtambua kwa uhakika kutokana na mazingira ya tukio, ikiwamo foleni ya magari na uwepo wa askari eneo hilo.

Baada ya mashahidi hao wawili kumaliza kutoa ushahidi, Wakili Mtukusye ameiambia mahakama kuwa hana shahidi mwingine wa kuwasilisha siku hiyo, akiomba kesi iahirishwe hadi kesho ili kuendelea na ushahidi wa mashahidi watatu wa Jamhuri waliosalia.

Wakili wa utetezi, Yohana Kibingu, amesema hana pingamizi kuhusu ombi hilo.

Hakimu Rugemalira ameahirisha kesi hiyo hadi kesho, Jumanne, Oktoba 27, 2026, itakapoendelea na ushahidi wa mashahidi wengine watatu wa upande wa Jamhuri. Ameeleza kuwa kesi hiyo itasikilizwa kwa siku mbili mfululizo, hadi Jumatano, Oktoba 28, 2026.

Post navigation

Previous: Tanzania: Dr Samia Set to Grace the Official Opening of Mtumba Government City Oct 30

Next: Video za wahitimu kidato cha nne zawaibua wadau

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Polisi Mwanza kukagua kamera za usalama hosteli za wanafunzi

4 mins read

Polisi Mwanza kukagua kamera za usalama hosteli za wanafunzi

Habari za Dharura

October 28, 2026 Admin0

Wanawake waongoza mahafali ya kwanza TIA Zanzibar, Waziri Omar atoa neno

3 mins read

Wanawake waongoza mahafali ya kwanza TIA Zanzibar, Waziri Omar atoa neno

Habari za Dharura

October 28, 2026 Admin0

1 min read

Tanzania: First VP Urges Blend of Religious, Secular Education

Habari za Dharura

October 28, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.