Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Bustani ya Posta, pumziko la bure katikati ya Dar es Salaam

8 mins read

Bustani ya Posta, pumziko la bure katikati ya Dar es Salaam

Habari za Dharura

October 30, 2026 Admin0

Dar es Salaam. Wapo waliketi kwenye viti vya saruji, wengine wameegemea kingo za bustani, kila mmoja akitumia muda huo kupumzika kabla ya kuendelea na pilikapilika zake za maisha ya kila siku.

Hiyo ndiyo hali inayojitokeza katika Bustani ya Posta ya Zamani, katikati ya Jiji la Dar es Salaam, ambako miti yenye kivuli, viti vya kukalia na mazingira ya wazi yameifanya kuwa kimbilio la wengi wanaotafuta mahali pa kupumzisha miili na akili.

Nje ya bustani hiyo, magari yanapita kwa kasi, watu wanatembea kwenda maeneo mbalimbali, huku wengine wakihangaika kutafuta huduma na riziki.

Ndani ya bustani, kila mmoja anaendelea na lake; wapo wanazungumza, waliokaa na kutafakari na wengine wakicheza na simu zao kabla ya kuendelea na majukumu yao.

Hakuna gharama ya kuketi wala sharti la kununua bidhaa ili kupata nafasi ya kupumzika. Kwa baadhi ya wanaotembelea eneo hilo, dakika chache wanazotumia chini ya kivuli cha miti zinatosha kupunguza uchovu na kuwapa nguvu ya kuendelea na shughuli zao.

Pembeni mwa bustani hiyo, shughuli mbalimbali za utoaji huduma zinaendelea. Wapo wauza chai na kahawa, wang’arisha viatu na wauza magazeti, miongoni mwa wengine wanaochangia shughuli za kiuchumi katika eneo hilo.

Kwa mtu anayepita kwa haraka, huenda bustani hiyo ikaonekana eneo la kawaida lenye miti na viti. Hata hivyo, kwa wanaoitumia mara kwa mara, ina umuhimu unaozidi uzuri wa mandhari, kwani ni sehemu inayowapa nafasi ya kupumzika bila gharama.

Baraka John, mkazi wa Gongo la Mboto, ni miongoni mwa wanaotumia bustani hiyo wanapokuwa na shughuli za katikati ya Jiji.

Anasema jua na joto la Dar es Salaam vinaweza kumchosha mtu anayelazimika kutembea kutoka eneo moja kwenda jingine, hivyo uwepo wa sehemu yenye kivuli na viti vya kukalia ni msaada tosha kwa wanaohitaji kupumzika.

“Kwa jua hili unaweza kutembea hadi ukahisi kizunguzungu, sasa hapa ndiyo sehemu ambayo unaweza kupumzika. Angalau kuna eneo hili ambalo kila Mtanzania anaweza kupata mapumziko bila gharama yoyote,” anasema.

Baraka anaeleza kuwa bustani hiyo humsaidia kupunguza uchovu, hasa anapokuwa ametumia muda mwingi kutekeleza shughuli zake chini ya jua.

Wakati Baraka akiitumia bustani hiyo kupata kivuli na kupumzika, kwa Christopher Suba, mwanafunzi wa Chuo cha Usimamizi wa Fedha (IFM) na mkazi wa Kurasini, eneo hilo ni sehemu ya kusubiria kabla ya kwenda kuanza vipindi vya masomo.

Christopher anasema anapowahi kufika katikati ya Jiji kabla ya muda wa vipindi chuoni, hupendelea kuketi bustanini hapo, kupunga upepo na kufurahia utulivu uliopo badala ya kutafuta sehemu nyingine ya kusubiri.

“Hapa hakuna mtu atakuuliza unafanya nini, hivyo nikishuka kwenye mwendokasi na kama ratiba yangu ya vipindi haijaanza, huwa nakaa kwanza hapa kupunga upepo, kisha naenda zangu chuoni.

“Natamani maeneo kama haya yangekuwa mengi kwa sababu ya umuhimu wake,” anasema.

Sehemu ya mipango miji

Umuhimu wa maeneo kama Bustani ya Posta ya Zamani hauishii katika kuwapa wananchi sehemu ya kupumzika, bali pia unahusiana na mipango ya maendeleo ya miji na uhifadhi wa mazingira.

Mtaalamu wa Mipango Miji, Raphael Nyoni anasema bustani hazitengenezwi kwa ajili ya kupendezesha mandhari pekee, bali ni sehemu muhimu ya miundombinu ya kijamii na kimazingira inayochangia ustawi wa wananchi.

Anasema kadiri miji inavyokua, ongezeko la majengo, barabara na shughuli za kiuchumi umuhimu wa kuwa na maeneo ya wazi ambako wananchi wanaweza kupumzika, kukutana na kujikinga na athari za joto unaongezeka.

“Bustani kama ile ya Posta ya Zamani zina umuhimu wa pekee kwa kuwa zipo katikati ya maeneo yenye shughuli nyingi za kiuchumi, ambako maelfu ya watu hupita kila siku kutafuta huduma, kufanya biashara na kutekeleza majukumu mbalimbali,” anasema.

Nyoni anaeleza kuwa maendeleo ya miji hayapaswi kupimwa kwa idadi ya majengo na barabara pekee, bali pia kwa namna mazingira yake yanavyokidhi mahitaji ya watu wanaoishi na kufanya shughuli zao humo.

Anasema miti iliyopo katika bustani hutoa kivuli na kusaidia kupunguza joto katika maeneo yanayoizunguka. Vilevile, mazingira ya kijani na sehemu tulivu za kuketi zinaweza kusaidia kupunguza uchovu na msongo wa mawazo unaotokana na shughuli za kila siku.

Maelezo hayo yanaungwa mkono na Ofisa Mazingira wa Halmashauri ya Jiji la Dar es Salaam, Theresia Denis, anayesema bustani na maeneo ya wazi ni muhimu katika kuboresha mazingira ya jiji, hasa katika maeneo yenye majengo mengi na shughuli nyingi za kiuchumi.

Anasema halmashauri ina jukumu la kutunza na kuhifadhi mazingira, ikiwemo kudhibiti taka na kuhakikisha maeneo ya wazi yanatunzwa kwa manufaa ya umma.

Theresia anaeleza kuwa baadhi ya maeneo hayo yanatunzwa moja kwa moja na halmashauri, huku mengine yakihudumiwa kwa ushirikiano na wadau mbalimbali, wakiwemo taasisi za fedha zinazosaidia kuboresha mandhari ya Jiji.

Akizungumzia Bustani ya Posta ya Zamani, anasema eneo hilo ni mali ya halmashauri, lakini linatunzwa kwa ushirikiano na benki moja kupitia utaratibu unaolenga kuhakikisha linaendelea kuwa wazi kwa matumizi ya umma.

Anasema wananchi wanaruhusiwa kufika bustanini kupumzika, kusubiri watu, kukutana na kufanya shughuli nyingine zinazoendana na matumizi yaliyokusudiwa ya eneo hilo, mradi wasiharibu mazingira.

“Sheria ya mipango miji inataka maeneo ya wazi yawe huru kwa matumizi ya umma. Kwa hiyo, mtu yeyote anaweza kufika pale kupumzika au kusubiri mtu, mradi asifanye jambo linaloharibu eneo hilo,” anasema.

Kwa mujibu wa Theresia, bustani zina umuhimu mkubwa katika jiji lenye majengo na shughuli nyingi za kiuchumi, kwa kuwa husaidia kuboresha mandhari, kuimarisha uoto wa asili na kuchangia udhibiti wa hali ya hewa katika maeneo ya mijini.

Hata hivyo, Nyoni anasisitiza kuwa mipango miji inapaswa kuzingatia uhifadhi wa miti, usafi, usalama, uwepo wa viti vya kutosha na miundombinu inayoweza kutumiwa na watu wenye ulemavu.

Anasema hatua hizo ni muhimu ili kuhakikisha bustani zinaendelea kutimiza madhumuni yake na kuwa maeneo yanayoweza kutumiwa na wananchi wa makundi mbalimbali.

Mchango wake kwa afya

Mbali na umuhimu wake katika mipango miji na uhifadhi wa mazingira, maeneo ya kijani yana mchango katika kulinda afya na ustawi wa wananchi.

Mtaalamu wa afya ya jamii Faraja Kyando anasema bustani zenye miti na maeneo ya kijani husaidia kupunguza athari za joto na kuchangia ustawi wa kimwili na kisaikolojia, hasa katika miji yenye shughuli nyingi za kiuchumi kama Dar es Salaam.

Anasema miti husaidia kupunguza joto kwa kutoa kivuli kinachozuia mionzi ya jua kupiga moja kwa moja miili ya watu na nyuso za ardhi zinazohifadhi joto, zikiwemo saruji na lami.

Vilevile, kupitia mchakato wa upotevu wa maji kutoka kwenye majani, unaojulikana kitaalamu kama transpiration, miti huchangia kupunguza joto katika mazingira yanayoizunguka.

Kwa mujibu wa Faraja, hali hiyo inaweza kuwapa nafuu wananchi wanaotembea au kufanya shughuli zao nje chini ya jua kali, hasa katika maeneo ya mijini ambako watu wengi hutumia muda mwingi nje ya nyumba zao kutafuta riziki.

“Joto kali linaweza kusababisha upungufu wa maji mwilini, uchovu, maumivu ya kichwa na kizunguzungu, huku kwa baadhi ya watu likiongeza hatari ya matatizo makubwa ya kiafya yanayohusiana na joto. Uwepo wa maeneo yenye kivuli na sehemu za kuketi unawapa wananchi fursa ya kupunguza muda wanaokaa kwenye jua na kupumzisha miili kabla ya kuendelea na shughuli zao,” anasema.

Faraja anaongeza kuwa maeneo ya kijani yanaweza pia kusaidia ustawi wa kisaikolojia. Anasema kutumia muda katika mazingira ya asili kunaweza kupunguza msongo wa mawazo, kuboresha hali ya kihisia na kuongeza utulivu wa akili.

Mbali na manufaa hayo ya kiafya, anasema bustani zina umuhimu wa kijamii kwa kuwa zinatoa nafasi kwa watu kukutana, kuzungumza na kupumzika bila kulazimika kutumia fedha.

Hata hivyo, anasisitiza umuhimu wa kuyatunza maeneo hayo kwa kuhakikisha kuna miti ya kutosha, viti salama, usafi, njia zinazofikika kwa watu wenye ulemavu na mazingira yanayoruhusu mzunguko mzuri wa hewa.

Kwa wakazi na wageni wanaopita katikati ya Dar es Salaam, Bustani ya Posta ya Zamani inaendelea kuwa zaidi ya eneo lenye miti na viti. Ni sehemu inayowaunganisha watu wenye shughuli na mahitaji tofauti, huku ikiwapa nafasi ya kupumzika bila gharama kabla ya kurejea katika pilikapilika za jiji.

Post navigation

Previous: Tanzania: No, Image of Tanzania’s President Meeting Man Dressed in Animal Skins and Carrying an Axe Is Doctored

Next: Women dominate first TIA Zanzibar graduation as Omar hails progress on gender equality

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Wahitimu wagombania msichana, mmoja atuhumiwa kumuua mwenzake

2 mins read

Wahitimu wagombania msichana, mmoja atuhumiwa kumuua mwenzake

Habari za Dharura

October 30, 2026 Admin0

Kilomita 59 za lami zajengwa Mji wa Serikali Mtumba

1 min read

Kilomita 59 za lami zajengwa Mji wa Serikali Mtumba

Habari za Dharura

October 30, 2026 Admin0

Kutoka wazo hadi uhalisia, safari ya miaka 53 yatimia

6 mins read

Kutoka wazo hadi uhalisia, safari ya miaka 53 yatimia

Habari za Dharura

October 30, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.