Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Kauli ya Ubalozi wa Tanzania madai ya Mwaipaya kutekwa Nairobi

3 mins read

Kauli ya Ubalozi wa Tanzania madai ya Mwaipaya kutekwa Nairobi

Habari za Dharura

October 26, 2026 Admin0

Nairobi. Balozi wa Tanzania nchini Kenya, Dk Bernard Kibesse amesema wanafuatilia madai ya kutekwa kwa Mtanzania, Twaha Mwaipaya huku vuguvugu la kisiasa la Linda Mwananchi nchini humo likilaani tukio la kutoweka kwa mwanaharakati huyo.

Mwaipaya aliyewahi kuwa Mratibu wa Hamasa wa Baraza la Vijana la Chadema (Bavicha) Taifa, anadaiwa kutekwa jana Jumapili Oktoba 25, 2026, akiwa kwenye teksi eneo la Kamulu, Kaunti ya Machakos nchini Kenya, akiwa kwenye safari zake.

Leo, Oktoba 26, 2026, Mwananchi limewasiliana na Balozi wa Tanzania nchini Kenya, Dk Kibesse akisema wanafuatilia suala hilo.

“Bado taarifa ya tukio hilo hatujazipata, hivyo tunafuatilia,” amesema.

Tukio hilo limeripotiwa na shirika la kimataifa la kutetea haki za binadamu la Amnesty International Kenya ambalo kwenye taarifa yake limesema waliomteka walikuwa wakitumia magari matatu, likiwamo Toyota Land Cruiser Hardtop, walipomzuia.

“Twaha Mwaipaya, raia wa Tanzania, anaripotiwa kutekwa leo (Jumapili) majira ya saa nane mchana eneo la Kamulu, Kaunti ya Machakos, na watu waliokuwa wakisafiri kwa magari matatu, likiwamo Toyota Land Cruiser Hardtop.

“Alikuwa akisafiri kwa teksi kwenda kuwatembelea marafiki,” shirika hilo limesema katika taarifa iliyochapishwa kwenye mitandao ya kijamii Jumapili.

Shirika hilo liliwataka watu wenye taarifa kuhusu aliko mwanaharakati huyo kujitokeza, huku likizitaka mamlaka kubaini alipo na kuhakikisha usalama wake.

Kufuatia tukio hilo, vuguvugu la kisiasa nchini Kenya la Linda Mwananchi, limeitaka Serikali ya nchi hiyo kufichua alipo mwanaharakati huyo wa Tanzania, akiwa nchini humo.

Katika taarifa yake iliyotolewa leo Jumatatu, Oktoba 26, 2026, Linda Mwananchi imezitaka mamlaka za Kenya kuhakikisha usalama wa Mwaipaya na kumlinda dhidi ya uwezekano wa kuondolewa nchini humo kwa nguvu.

“Tunazitaka mamlaka za Kenya kufichua alipo, kuhakikisha usalama wake na kumlinda dhidi ya kuondolewa nchini Kenya kwa nguvu,” imesema sehemu ya taarifa hiyo.

Kwa mujibu wa Linda Mwananchi, tukio hilo endapo litathibitishwa, linakwenda kinyume na misingi ya demokrasia na mshikamano ambao Kenya inapaswa kuwa nao kwa nchi jirani.

Mkuu wa Mawasiliano wa Linda Mwananchi, Pauline Njoroge amesema Kenya imekuwa ikitoa hifadhi kwa watetezi wa demokrasia na haki za binadamu wanaokimbia mateso katika nchi za eneo hilo, hivyo haipaswi kuwa mahali ambako watu hao wanafuatiliwa, kutekwa na kurejeshwa kwa nguvu katika nchi wanazohofia.

“Tunataka uchunguzi huru kuhusu kutekwa kwake na uwajibikaji kwa kila aliyehusika, bila kujali cheo chake au uraia wake,” amesema Njoroge.

Amesema kumekuwa na matukio kadhaa ya kutekwa kwa viongozi wa upinzani na watetezi wa haki za binadamu kutoka nchi jirani.

Kwa mujibu wa Linda Mwananchi, kiongozi wa upinzani nchini Uganda, Dk Kizza Besigye alitekwa jijini Nairobi, Kenya, Novemba 2024, huku mwanaharakati wa Tanzania, Maria Sarungi Tsehai, akidaiwa kutekwa na watu wenye silaha katika jiji hilo Januari 2025.

Linda Mwananchi imetaka mamlaka za Kenya kufichua mara moja alipo Mwaipaya, kufanya uchunguzi huru kuhusu tukio hilo na kuwawajibisha wote waliohusika bila kujali nyadhifa au uraia wao.

Pia, imelaani kile linachokiita mmomonyoko wa uhuru wa kidemokrasia nchini Kenya, likisema hali hiyo inahatarisha pia usalama wa watu kutoka nchi nyingine wanaotafuta hifadhi.

Hadi kufikia leo Jumatatu, Oktoba 26, 2026, haijajulikana mahali alipo Mwaipaya, huku utambulisho wa watu wanaodaiwa kumteka na mazingira ya kutoweka kwake yakiwa hayajathibitishwa kwa njia huru.

Tukio hilo limeibua tena wasiwasi kuhusu usalama wa wanaharakati wa upinzani kutoka Tanzania na watetezi wa haki za binadamu wanaoishi Kenya, kufuatia matukio ya awali yaliyohusisha wanaharakati wanaodaiwa kulengwa wakiwa katika ardhi ya Kenya.

Hadi Jumatatu, Jeshi la Polisi la Kenya, Idara ya Upelelezi wa Makosa ya Jinai (DCI) na Serikali walikuwa hawajatoa taarifa kuhusu madai hayo ya kutekwa.

Post navigation

Previous: Police expose dangerous traffic violations

Next: Mradi wa umeme Songea –Tunduru kufungua fursa za kiuchumi kusini

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

CRDB yavuna faida ya Sh962 bilioni, Dk Nsekela atoa mwelekeo

1 min read

CRDB yavuna faida ya Sh962 bilioni, Dk Nsekela atoa mwelekeo

Habari za Dharura

October 27, 2026 Admin0

Kabudi aagiza watumishi waachie majengo ya kupanga, waende Mtumba

1 min read

Kabudi aagiza watumishi waachie majengo ya kupanga, waende Mtumba

Habari za Dharura

October 27, 2026 Admin0

Mchengerwa: Ubora wa dawa hautashushwa kwa ajili ya uwekezaji

5 mins read

Mchengerwa: Ubora wa dawa hautashushwa kwa ajili ya uwekezaji

Habari za Dharura

October 27, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.