Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Nguo za kuogelea za kukodisha, kuchangia mataulo kunavyohatarisha afya

4 mins read

Nguo za kuogelea za kukodisha, kuchangia mataulo kunavyohatarisha afya

Habari za Dharura

October 30, 2026 Admin0

Dar es Salaam. Matumizi ya taulo na mavazi ya kuogelea (swimsuits) ya kuchangia yanaweza kuonekana kuwa jambo la kawaida, hasa katika hoteli, fukwe na mabwawa ya kuogelea.

Hata hivyo, wataalamu wa afya wanaonya kuwa tabia hiyo inaweza kuongeza uwezekano wa kusambaza baadhi ya vimelea vinavyosababisha maambukizi ya ngozi na sehemu za siri.

Swali linalozua mjadala ni iwapo mtu anaweza kupata magonjwa ya zinaa kwa kutumia taulo au vazi la kuogelea lililotumiwa na mtu mwenye maambukizi.

Mara kadhaa, marafiki wanaokwenda kuogelea pamoja, baada ya kutoka majini, mmoja akigundua amesahau taulo lake, marafiki humkopesha taulo, huku mwingine akimpa mwenzake nguo ya kuogelea ili aitumie.

Kwao, jambo hilo huonekana kuwa la kawaida. Lakini kitaalamu, je, kuna hatari yoyote ya kiafya inayoweza kujificha katika matumizi hayo?

Akizungumza na Mwananchi leo Ijumaa, Oktoba 30, 2026, Daktari Bingwa wa Magonjwa ya Uzazi na Wanawake kutoka Ifakara, Morogoro, Elias Kweyamba, amesema ni hatari kutumia taulo linalotumiwa na mtu mwingine.

Hata hivyo, amesema magonjwa mengi ya zinaa hayaambukizwi kwa kushirikiana taulo kwa sababu vimelea vinavyosababisha magonjwa hayo hutegemea mazingira maalumu ya mwili wa binadamu ili kuendelea kuishi.

Amesisitiza kuwa si sahihi kuhusisha kila maambukizi yanayoweza kupatikana kupitia vifaa binafsi na magonjwa ya zinaa.

“Hata hivyo, kuna baadhi ya vimelea vinavyoweza kusambaa kupitia nguo, mashuka na taulo zilizochafuliwa,” amesema Dk Kweyamba.

Ametolea mfano chawa wa sehemu za siri (pubic lice), ambao huenezwa zaidi kwa mgusano wa karibu wa miili, hususan wakati wa kujamiiana.

Kwa mujibu wa Kituo cha Kudhibiti na Kuzuia Magonjwa cha Marekani (CDC), maambukizi yanaweza kutokea mara chache kupitia nguo, mashuka au taulo zilizotumiwa na mtu mwenye chawa hao.

Ushahidi mwingine unahusu kimelea cha Trichomonas vaginalis, kinachosababisha trichomoniasis.

Mapitio ya kisayansi yaliyochapishwa mwaka 2022 katika jarida la Clinical Infectious Diseases yanaeleza kuwa kimelea hicho huambukizwa zaidi kwa njia ya ngono, lakini kinaweza kuishi kwa zaidi ya saa tatu katika mazingira yenye unyevunyevu na joto. Maambukizi kupitia vitu vilivyochafuliwa yanaelezwa kuwa nadra.

Utafiti uliochapishwa mwaka 2003 katika PubMed, uliochunguza uwezo wa kimelea hicho kuishi nje ya mwili, ulionyesha kuwa baadhi ya vimelea vilibaki hai kwenye nyuso zilizotumika katika majaribio.

Hata hivyo, matokeo hayo hayathibitishi kwamba kushirikiana swimsuit au taulo ni njia ya kawaida ya kupata trichomoniasis.

Daktari Bingwa wa Magonjwa ya Uzazi na Wanawake, Isaya Mhando, ameshauri watu kuepuka kushirikiana vifaa binafsi vinavyogusana moja kwa moja na sehemu za siri, ikiwemo taulo na mavazi ya kuogelea.

Amesisitiza umuhimu wa kila mtu kuwa na vifaa vyake ili kupunguza uwezekano wa kuhamisha vimelea kutoka kwa mtu mmoja kwenda kwa mwingine.

Ni muhimu pia kuelewa kuwa magonjwa kama Virusi vya Ukimwi, kisonono na klamidia hayaambukizwi kwa kutumia taulo au swimsuit katika matumizi ya kawaida. Kaswende nayo huenezwa zaidi kwa kugusana moja kwa moja na kidonda cha kaswende wakati wa ngono, si kwa kutumia taulo za kawaida.

Kwa upande mwingine, Kweyamba ameonya kuwa taulo zinazobaki na unyevunyevu kwa muda mrefu zinaweza kuhifadhi bakteria na fangasi wanaoweza kusababisha matatizo ya ngozi.

Utafiti wa Oller na Mitchell uliochapishwa mwaka 2009 katika Journal of Infection in Developing Countries ulibaini kuwa bakteria aina ya Staphylococcus aureus wanaweza kuendelea kuishi kwenye taulo za pamba kwa zaidi ya saa 48 na kuhamia kwenye mikono ya watu.

Kuhusu kujikinga, wataalamu wanashauri kila mtu kutumia taulo lake, kutoshirikiana mavazi ya kuogelea, kufua nguo hizo baada ya matumizi na kuhakikisha zinakauka vizuri kabla ya kuzivaa tena.

Pia, taulo zinapaswa kufuliwa mara kwa mara kwa kufuata maelekezo ya mtengenezaji na kukaushwa vizuri.

Mtu mwenye dalili za maambukizi ya ngozi anashauriwa kutoshirikiana vifaa binafsi na wengine na kutafuta ushauri wa mtaalamu wa afya.

Kwa ujumla, ujumbe kwa jamii ni kwamba kujilinda dhidi ya maambukizi kunaanza na matumizi sahihi ya vifaa binafsi. Taulo na swimsuit si vifaa vya kukopeshana, hata kama ni marafiki wa karibu.

Post navigation

Previous: Simulizi ya malezi ya pacha wanne waliotimiza miaka minane Morogoro

Next: ACT-Wazalendo kuanza ziara ya siku 20 mikoa minane

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Wanafunzi wanane MUST mbaroni kwa tuhuma za udanganyifu wa mitihani

2 mins read

Wanafunzi wanane MUST mbaroni kwa tuhuma za udanganyifu wa mitihani

Habari za Dharura

October 30, 2026 Admin0

Mchakato kumpata Mkurugenzi Mkuu WHO waanza, saba wakitajwa

2 mins read

Mchakato kumpata Mkurugenzi Mkuu WHO waanza, saba wakitajwa

Habari za Dharura

October 30, 2026 Admin0

Mtwara waeleza matumaini ongezeko la gesi asilia

4 mins read

Mtwara waeleza matumaini ongezeko la gesi asilia

Habari za Dharura

October 30, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.