Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Tiba tatizo la moto masokoni

4 mins read

Tiba tatizo la moto masokoni

Habari za Dharura

October 28, 2026 Admin0

Dar es Salaam. Ukaguzi wa mara kwa mara wa mifumo ya umeme na usalama wa majengo umetajwa kuwa suluhu ya kupunguza majanga ya moto yanayojirudia katika masoko.

Maoni hayo yanakuja wakati ambao kuna mfululizo wa matukio ya moto masokoni. Ndani ya siku mbili kumezuka moto katika Soko la Veterinary na Stendi Mpya ya Buza kwa Mama Kibonge, Dar es Salaam na kuunguza vibanda na maduka.

Katika stendi hiyo, Wilaya ya Temeke, maduka 20 kati ya 64 yaliteketea Oktoba 25, 2026. Siku moja kabla, moto katika Soko la Veterinary uliteketeza vibanda 26 kati ya 230.

Matukio hayo yalitanguliwa na moto katika Soko la Machinga Complex Septemba 21 Dodoma na Soko la Mbao la Sabasaba, Mwanza, Septemba 22, mwaka huu.

Matukio ya moto

Ripoti ya Jeshi la Zimamoto na Uokoaji inaonesha kuwa kati ya Januari na Desemba 2025, jeshi hilo lilikabiliana na matukio 3,091 ya moto, sawa na wastani wa matukio 258 kwa mwezi au nane hadi tisa kwa siku.

Matukio hayo yalisababisha vifo vya watu 144 na majeruhi 295.

Mashine inayodaiwa kuwa chanzo cha moto ulioteketeza maduka 20 ikiwa mbele ya duka iliyounganishiwa waya, eneo la Stendi mpya ya Buza kwa Mama Kibonge, Wilaya ya Temeke jijini Dar es Salaam

Kwa mujibu wa ripoti hiyo, matukio 781 yalihusishwa na hitilafu za mifumo ya umeme, 215 na watoto kuchezea viberiti, huku 429 yakihusishwa na uchomaji taka mashambani.

Tatizo la mifumo ya umeme

Akizungumza juzi Jumatatu Oktoba 26, 2026, mtaalamu wa masuala ya umeme, Arafat Msanga amesema hitilafu za umeme ni miongoni mwa sababu za majanga ya moto, akisisitiza umuhimu wa kutumia wataalamu wanaotambulika katika ufungaji wa mifumo hiyo.

“Watu wanapaswa kutafuta wataalamu wa umeme wanaotambulika na mamlaka husika wanapounganisha umeme,” amesema.

Kwa upande wa masoko, amesema licha ya kutumia wataalamu, changamoto ni kutofanyika kwa ukaguzi wa mifumo ya umeme angalau mara tatu kwa mwaka.

“Kuna wengine hawafanyi kabisa ukaguzi, kwa hiyo hata kukitokea hitilafu ya waya inakuwa vigumu kugundua. Ndiyo maana mambo yanakuwa hivyo,” amesema.

Ukaguzi unafanyika vipi?

Mhandisi wa umeme, Peter Mokiwa amesema usalama wa umeme katika maeneo ya biashara hauishii kwenye kufunga nyaya pekee.

Amesema mabadiliko ya matumizi ya maduka, kuongezeka kwa vifaa vya umeme na uchakavu wa nyaya vinahitaji ukaguzi na matengenezo ya mara kwa mara.

Mokiwa amesisitiza umuhimu wa kuweka utaratibu unaoeleweka kuhusu muda wa ukaguzi, wahusika na hatua zinazochukuliwa kasoro zinapobainika.

Pia, amesema ni muhimu kuhakikisha mapendekezo ya ukaguzi yanatekelezwa na kumbukumbu za usalama wa mifumo zinawekwa.

Hawako tayari kukaguliwa

Mkaguzi wa Jeshi la Zimamoto na Uokoaji, Nasibu Mgoso amesema baadhi ya wafanyabiashara hawapo tayari kugharamia ukaguzi, hali inayokwamisha juhudi za kuzuia majanga.

“Tunapofika kwa wafanyabiashara wanakuwa wajuaji, wanaona wakifanyiwa ukaguzi na kulipa gharama ya Sh40,000 ni hasara sana kuliko hasara ya moto. Hiyo ni changamoto, lakini bado tunaendelea kutoa elimu na kufanya ukaguzi,” amesema.

Baadhi ya bidhaa ambazo zimeokolewa kwenye maduka yaliyoteketea kwa moto katika stendi mpya ya Buza kwa Mama Kibonge, Temeke, jijini Dar es Salaam.

Mgoso amesema matumizi ya moto katika shughuli za kila siku yanafanya iwe vigumu kumaliza kabisa ajali hizo, akisisitiza umuhimu wa ukaguzi wa mara kwa mara katika maeneo ya biashara.

Tanesco yafafanua

Mkurugenzi Mkuu wa Shirika la Umeme Tanzania (Tanesco), Lazaro Twange amesema jukumu la shirika hilo ni kufikisha umeme kulingana na kiwango kilichoombwa.

Amesema miundombinu ya umeme ndani ya soko ni jukumu la mwenye soko, anayepaswa kumtumia mhandisi au fundi wake.

“Ukisema moto masokoni, sisi si jukumu letu. Tanesco yenye jukumu lake ni kupeleka umeme hadi kwenye ile mita inayokwambia umetumia kiasi gani, kisha mambo ya ndani ni jukumu la mwenye nyumba au soko,” amesema.

Mikakati ya Serikali

Katika hotuba ya Makadirio ya Mapato na Matumizi ya Fedha ya mwaka 2026/27, Waziri wa Mambo ya Ndani ya Nchi, Patrobas Katambi amesema Serikali inaendelea kuweka kipaumbele katika kulinda maisha na mali za wananchi.

Amesema hadi Aprili 2026, elimu kuhusu kinga na tahadhari za moto ilikuwa imetolewa katika maeneo 23,327, yakiwamo nyumba za ibada, taasisi za elimu na maeneo yenye mikusanyiko ya watu.

Pia, vipindi 52 vya televisheni na 997 vya redio vilitumika kuongeza uelewa wa jamii kuhusu kinga na tahadhari za majanga.

Athari kwa biashara

Utafiti uliofanywa katika masoko ya Jiji la Mbeya mwaka 2014 ulibaini kuwa, majanga ya moto huathiri biashara na familia zinazotegemea biashara hizo kujipatia kipato.

Magdalena Lyimo aliyefunga khanga akiangalia stoo ya vinywaji iliyoteketea kwa moto usiku wa kuamkia Oktoba 24,2026 katika soko la Veterinary, Temeke, jijini Dar es Salaam

Utafiti huo uliwashirikisha wafanyabiashara wadogo 55. Matokeo yalionesha asilimia 90.9 ya biashara zilizochunguzwa hazikuwa na bima, huku asilimia 72.7 ya washiriki wakisema maisha ya familia zao yaliathirika kutokana na kutegemea mapato ya biashara hizo.

Matokeo hayo yanaonesha umuhimu wa kuimarisha kinga dhidi ya moto ili kulinda mitaji, biashara na kipato cha familia.

Post navigation

Previous: Mkuyu Africa seeks Russian investment partnerships at Moscow forum

Next: Kenya: Court Urged to Compel Security Agencies to Produce Missing Tanzanian Activist

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Watuhumiwa 40 wa ujangili wanaswa Serengeti ndani ya wiki mbili

4 mins read

Watuhumiwa 40 wa ujangili wanaswa Serengeti ndani ya wiki mbili

Habari za Dharura

October 28, 2026 Admin0

More than 40 suspected poachers arrested in Serengeti

3 mins read

More than 40 suspected poachers arrested in Serengeti

Habari za Dharura

October 28, 2026 Admin0

Kamati ya Mkuu wa Mkoa Mara yabaini madudu usimamizi wa usafi maeneo nyeti

4 mins read

Kamati ya Mkuu wa Mkoa Mara yabaini madudu usimamizi wa usafi maeneo nyeti

Habari za Dharura

October 28, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.