Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Watoto wanaozaliwa njiti waongezeka wataalamu wataja lishe, maradhi

5 mins read

Watoto wanaozaliwa njiti waongezeka wataalamu wataja lishe, maradhi

Habari za Dharura

October 30, 2026 Admin0

Dar/mikoani. Idadi ya watoto wanaozaliwa kabla ya wakati nchini Tanzania inaendelea kuwa changamoto ya afya ya mama na mtoto, ambapo zaidi ya watoto 200,000 wanakadiriwa kuzaliwa njiti kila mwaka.

Watoto hao huzaliwa kabla ya kutimiza wiki 37 za ujauzito, hali inayowaweka katika hatari kubwa ya kupata matatizo ya kiafya kutokana na viungo vyao kutokuwa tayari kwa kufanya kazi kikamilifu, hususan mfumo wa hewa, udhibiti wa joto la mwili na uwezo wa kunyonya.

Takwimu zinaonyesha kuwa watoto njiti wanakadiriwa kuwa kati ya asilimia 10 hadi 15 ya watoto wote wanaozaliwa nchini Tanzania.

Utafiti uliofanyika katika Kituo cha Kuzalia cha Hospitali ya Rufaa ya Kanda ya Kaskazini (KCMC) na maeneo yanayozunguka, ulibaini kuwa kiwango cha kuzaliwa njiti kwa watoto waliozaliwa mmoja mmoja, kilikuwa asilimia 11.7.

Utafiti huo pia ulionyesha kuwa kati ya mwaka 2000 na 2015 kulikuwa na ongezeko la watoto wanaozaliwa njiti, hasa wale waliozaliwa wakiwa na changamoto kubwa zaidi za kiafya.

Akizungumza na Mwananchi Agosti 7, 2026, Ofisa Muuguzi Mwandamizi na Kiongozi wa Wodi ya watoto wachanga katika Hospitali ya Rufaa ya Amana, Mary Machemba, amesema hospitali hiyo imeendelea kushuhudia ongezeko la watoto hao katika miaka ya karibuni.

“Kwa mwezi huu tumepokea watoto 423 waliolazwa, kati yao 158 ni njiti. Mwezi uliopita tulikuwa na watoto njiti 126 kati ya watoto 359. Kwa hiyo tunaona idadi ni kubwa ikilinganishwa na miaka mitatu nyuma ambapo kwa mwezi tuliwapata 40 au 50,” amesema.

Amesema watoto wengi wanaowapokea ni wale wenye uzito mdogo, hali ambayo mara nyingi huambatana na kuzaliwa kabla ya wakati.

Kwa mujibu wa Machemba, sababu zinazochangia ongezeko hilo ni pamoja na magonjwa kwa wajawazito, mimba za umri mdogo, changamoto za lishe na kuchelewa kuanza kliniki.

“Msichana anapopata ujauzito akiwa mdogo anaweza kupata uchungu kabla ya wakati. Pia mama akiwa na lishe hafifu mtoto naye anakosa virutubisho vya kutosha kwa sababu anategemea chakula kutoka kwa mama,” amesema.

Ameongeza kuwa upungufu wa damu, malaria na maambukizi mbalimbali kwa mjamzito vinaweza kusababisha uchungu kuanza mapema.

“Wengine hawaanzi kliniki mapema, hivyo magonjwa yanapogundulika yanakuwa yameendelea na yanaweza kusababisha mtoto kuzaliwa kabla ya wakati,” amesema.

Katika Mkoa wa Njombe, Muuguzi wa Hospitali ya Halmashauri ya Mji Njombe, Mary Lulesu, amesema hospitali hiyo inapokea wastani wa watoto njiti 12 hadi 25 kila mwezi.

Amesema changamoto kubwa zinazowakabili watoto hao ni baridi, matatizo ya mfumo wa hewa na baadhi ya familia kushindwa kuwapatia matunzo yanayohitajika kutokana na imani potofu.

“Tunalazimika kutoa elimu kwa wazazi kuwa mtoto njiti ni mtoto kama wengine na akipata huduma sahihi anaweza kukua vizuri,” amesema.

Takwimu kutoka Hospitali ya Rufaa ya Mkoa wa Mwanza, Sekou Toure, na Hospitali ya Rufaa ya Kanda ya Bugando zinaonyesha kuwa zaidi ya watoto njiti 120 hupokelewa kila mwezi katika hospitali hizo mbili pekee.

Mkoa huo ulipokea watoto 2,282 mwaka 2024, kutoka 1,789 mwaka 2019.

Wilaya ya Nyamagana, yenye Hospitali ya Wilaya ya Nyamagana na Sekou Toure, ndiyo inayoongoza kwa idadi ya watoto hao.

Ilipokea watoto njiti 445 mwaka 2019, mwaka 2020 wakafikia 478. mwaka 2021 walikuwa 459, mwaka 2022 (645), mwaka 2023 (804) na mwaka 2024 wakafikia 983.

Mei 15, 2025, akizungumza wakati wa kupokea msaada wa vibebeo maalumu kwa ajili ya huduma ya kangaroo, Mkuu wa Idara ya Watoto katika Hospitali ya Sekou Toure, Dk Magreth Guranywa, alisema hospitali hiyo hupokea kati ya watoto njiti 70 na 90 kwa mwezi.

Muuguzi Kiongozi wa Kitengo cha Watoto katika Hospitali ya Bugando, Dismas Mauki, alisema hospitali hiyo ambayo awali ilikuwa ikipokea watoto njiti mara moja moja, sasa inawapokea kila siku, na kufanya idadi yao kwa mwezi kufikia kati ya 30 na 40. Watoto hao wanatoka katika mikoa ya Kanda ya Ziwa, hususan Mwanza.

Mtaalamu wa Magonjwa ya Kina Mama na Uzazi katika Hospitali ya Taifa ya Muhimbili, Dk Nathanael Mtinangi, amesema sababu za watoto kuzaliwa njiti ni nyingi, zikiwamo hali ya kiafya ya mama na changamoto zinazojitokeza wakati wa ujauzito.

Ametaja baadhi ya sababu hizo kuwa ni urefu wa njia ya uzazi kwa baadhi ya wanawake, magonjwa kama kifafa cha mimba, matatizo ya moyo, maambukizi makali na ajali zinazoweza kuathiri tumbo la mama.

“Wakati mwingine madaktari hulazimika kumtoa mtoto mapema kwa sababu kuendelea kukaa tumboni kunaweza kuhatarisha maisha ya mama au mtoto,” amesema.

Kwa upande wake, Meneja wa Mradi wa Afya ya Mama na Mtoto na Mtaalamu wa Lishe kutoka World Vision Tanzania, Dk Daud Gambo, amesisitiza kuwa lishe ya mama mjamzito ina nafasi kubwa katika ukuaji wa mtoto tumboni.

Amesema mama mwenye lishe duni anaweza kupata upungufu wa damu na kuwa katika hatari ya kupata maambukizi yanayoweza kuathiri ujauzito.

“Wakati mwingine mtoto anazaliwa miezi tisa lakini uzito wake ni mdogo kwa sababu hakukua vizuri tumboni. Sehemu kubwa ya tatizo hili inahusiana na lishe ya mama,” amesema.

Shisha

Mkuu wa Idara ya Huduma za Wagonjwa wa Nje wa Hospitali ya Benjamin Mkapa, Dk Mugisha Nkoronko, ameonya kuwa uvutaji wa shisha, hasa kwa wanawake wajawazito, unaweza kusababisha madhara kwa mama na mtoto, yakiwamo kuzaliwa kabla ya wakati na matatizo ya ukuaji.

Amesema moshi wa shisha huathiri pia watu wanaokuwa karibu na wavutaji. Aidha, amewataka wanawake kuzingatia lishe bora na kujiandaa kiafya kabla ya kupata ujauzito.

Katika kukabiliana na changamoto hiyo, wadau mbalimbali wameendelea kuwekeza katika huduma za watoto wachanga.

Imeandikwa na Herieth Makwetta (Dar), Saada Amir (Mwanza) na Seif Jumanne (Njombe).

Post navigation

Previous: ACT-Wazalendo kuanza ziara ya siku 20 mikoa minane

Next: Hospitali ya Mount Meru yaanzisha huduma za saratani

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Wanafunzi wanane MUST mbaroni kwa tuhuma za udanganyifu wa mitihani

2 mins read

Wanafunzi wanane MUST mbaroni kwa tuhuma za udanganyifu wa mitihani

Habari za Dharura

October 30, 2026 Admin0

Mchakato kumpata Mkurugenzi Mkuu WHO waanza, saba wakitajwa

2 mins read

Mchakato kumpata Mkurugenzi Mkuu WHO waanza, saba wakitajwa

Habari za Dharura

October 30, 2026 Admin0

Mtwara waeleza matumaini ongezeko la gesi asilia

4 mins read

Mtwara waeleza matumaini ongezeko la gesi asilia

Habari za Dharura

October 30, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.