Skip to content

site mode button

Kuhusu Sisi
Sera ya Faragha
Sheria na Masharti
Wasiliana Nasi

Search for:

Simulizi ya malezi ya pacha wanne waliotimiza miaka minane Morogoro

7 mins read

Simulizi ya malezi ya pacha wanne waliotimiza miaka minane Morogoro

Habari za Dharura

October 30, 2026 Admin0

Morogoro. Bila shaka unakumbuka habari ya Desemba 18, 2017 kuhusu mama aliyejifungua pacha wanne mkoani Morogoro. Hakuchi hakuchi kumekucha, sasa watoto hao wana umri wa miaka minane, wakiwa na siha na afya njema.

Lilikuwa ni tukio la furaha katika jamii, lakini liliibua sintofahamu kwenye familia, hasa kuhusu matunzo ya watoto hao ambao walikuja kwa pamoja huku wakihitaji huduma stahiki kwa ajili ya ukuaji wao.

Mwananchi imeitembelea familia hiyo kushuhudia ukuaji wa watoto hao na kusikiliza simulizi za wazazi ambao wanaeleza changamoto walizopitia katika malezi yao hadi umri huo.

Asha Said, mkazi wa Mazimbu, Manispaa ya Morogoro, ni mama wa watoto hao ambao wawili ni wa kike na wawili ni wa kiume –Shafii, Shariff, Zena na Zeana ambao walizaliwa kwa njia ya upasuaji.

Asha amesema changamoto zilianza wakati wa ujauzito huo kwani ulikuwa tofauti na mimba nyingine alizowahi kubeba awali, kila ulipokuwa ukikua, alihisi kubeba uzito mkubwa tumboni na kushindwa kufanya shughuli zake za nyumbani, kushindwa kutembea, muda mwingi aliutumia kulala.

“Wakati nabeba ujauzito wa hawa pacha, tayari nilishakuwa na watoto wengine wawili, lakini ujauzito wa hawa ulikuwa wa tofauti; kwanza nilikuwa na tumbo kubwa ambalo lilikuwa likiongezeka kila uchao, ilifika mahala nikawa siwezi kufanya kazi yoyote na ili niinuke kitandani, ilibidi nipate msaada wa kunyanyuliwa,” amesema Asha.

Amesema hata kuoga mwenyewe hakuweza, hivyo alikuwa akiogeshwa akiwa amekaa kwenye kiti, na ameeleza kuwa hali hiyo ilimpa wasiwasi na alipokwenda kupima ‘utra sound’ ndipo alielezwa na madaktari kuwa ana watoto pacha watatu.

“Ilipofika miezi tisa nilipangiwa tarehe ya kwenda kufanyiwa upasuaji huku nikijua nina pacha watatu. Hata hivyo kabla ya siku niliyopangiwa nikafanyiwe upasuaji, ghafla nilipata uchungu na nilipofika hospitali niliingizwa kwenye chumba cha upasuaji nikihudumiwa na madaktari wasiopungua 10,” amesema Asha.

Amesema baada ya madaktari kumfanyia upasuaji na kuwatoa watoto watatu, wakati wakimshona, walihisi uwepo wa mtoto mwingine wa nne, kwa kuwa tumbo lilikuwa bado kubwa na pia alianza kucheza tumboni.

Mama huyo amesema baada ya madaktari kugundua uwepo wa mtoto wa nne, walimchoma tena sindano ya usingizi na alipozinduka alijikuta yupo wodini na alipouliza walipo watoto wake, madaktari walimwambia kwamba amejifungua pacha wanne na wamewekwa kwenye chumba maalumu chenye joto.

“Watoto hawa pacha niliwazaa wote wakiwa na uzito kilo mbili, walitofautiana gramu tu, mtoto wa kwanza kutolewa tumboni ni Shafii, wa pili ni Zeana, wa tatu Shariff na wa mwisho ni Zena,” amesema Asha.

Ameeleza kuwa saa chache baada ya kupata fahamu, wauguzi walimpeleka kwenda kuwaona na kuwanyonyesha watoto wake hao waliokuwa kwenye chumba maalumu cha joto, hata hivyo amesema furaha yake ilichanganyika na hofu kubwa iliyoambatana na maswali mengi kichwani mwake na moja ya maswali hayo ni namna gani ataweza kuwaelea watoto hao.

“Mpaka wakati nakwenda kujifungua sikuwa na ajira yoyote wala biashara, mume wangu ndiye alikuwa mwendesha bodaboda na alikuwa akijihusisha na kilimo, tunaishi kwenye chumba na sebure, tena cha kupanga, nikawa nawaza nitawatunza vipi watoto wote hawa, maana sasa familia yetu ikawa na watoto sita ukijumlisha na wale wawili tuliowazaa awali,” amesema Asha.

Ameongeza kuwa baada ya wiki mbili watoto wake waliendelea kukua vizuri na hivyo aliruhusiwa kurudi nao nyumbani huku akipewa masharti ya namna ya kuwatunza ikiwa ni pamoja na kutowapa chakula chochote zaidi ya maziwa yake au maziwa ya kopo kwa miezi sita.

Asha amesema baada ya kurudi nyumbani ndugu, jamaa na wasamalia wema walijitokeza kumpa misaada mbalimbali yakiwemo maziwa, sabuni, chakula pamoja na nguo za watoto.

Mama huyo amesema wakati anaendelea kuwalea, baadhi ya watu walimshauri kuwagawa watoto hao kwa watu wenye uwezo au kuomba msaada wa Serikali wa malezi kwa kuwachukua watoto wawili na kuwapeleka kwenye vituo vya kulelea watoto yatima, jambo ambalo amesema hakukubaliana nalo badala yake alikomaa mwenyewe kuwalea.

Asha ambaye kwa sasa anafahamika mtaani kwa jina la mama wanne, amesema baada ya misaada kukata, hali ya maisha ilikuwa ngumu, hivyo alilazimika kuanza kufanya biashara ndogondogo ili amsaidie mume wake kuhudumia familia.

Amesema watoto wake walipofika mwaka mmoja na miezi minne alilazimika kuwaachisha kunyonya na kuwapeleka kwa bibi yao ili yeye aweze kufanya kazi katika kiwanda cha jezi cha Mazava, hata hivyo siku chache baada ya kuwapeleka huko bibi yao alifariki dunia.

“Baada ya bibi yao kufariki ikabidi niwachukue, na hapo sasa ndipo niliamua kuwapeleka shule (day care), nikitoka kazini nawafuata na kurudi nao nyumbani. Leo hii wamefika darasa la tatu na mimi bado nafanya kazi,” amesema Asha.

Haikuwa kazi nyepesi

Kwa upande wake, baba wa watoto hao, Omary Mkwanda amesema haikuwa kazi nyepesi kuwalea watoto hao mpaka wamefika umri huo wa miaka minane hasa ukizingatia kipato chake kinachotokana na kazi ya bodaboda na kilimo, ni kidogo.

Mkwanda amesema nyakati ngumu alizokuwa akizipitia kwenye malezi ya watoto hao walipokuwa wachanga ni pale walipoumwa wote kwa pamoja ambapo wote walihitaji matibabu, pia mtoto mmoja alipokataa kunyonya tangu alipozaliwa.

“Huyu mmoja anayeitwa Shafii, tangu alipozaliwa aligoma kunyonya ziwa la mama, hivyo alikuwa akinywa maziwa ya kopo kwa kutumia kijiko na hata walipoacha kunyonya wenzake, yeye ilibidi aendelee kunywa maziwa ya kopo ambayo ni gharama kubwa,” amesema Mkwanda.

Mkwanda amesema wakati wa kuwapeleka kliniki watoto hao ilikuwa ni changamoto kwani alilazimika kusitisha shughuli zake za bodaboda kutwa nzima ili amsaidie mke wake kuwabeba watoto na kuwapeleka kliniki.

“Mimi nilikuwa nabeba watoto wawili, mmoja mgongoni mwingine kifuani na mke wangu naye anabeba wawili, japokuwa kuna wakati tulikuwa tukipata msaada wa ndugu na jamaa kuwabeba, na hapo inabidi tutumie usafiri wa teksi au bajaji maana siwezi kuendesha pikipiki tukiwa tumebeba watoto hivi,” amesema Mkwanda.

Ameongeza kuwa: “Wakati wa usiku akianza kulia mmoja, baada ya muda mfupi wote wanalia na hapo hujui umbembeleze yupi, umwache yupi, kiukweli namshukuru Mungu mpaka leo hii wamefika miaka minane, siamini.”

Akieleza tabia na maendeleo yao shuleni, Mkwanda amesema kila mmoja ana tabia tofauti na mwingine japokuwa zipo tabia za ziada ambazo zinafanana, akimtaja mmoja wa watoto hao, Shafii, kwamba amekuwa na tabia za kipekee ikiwa ni pamoja na upole, na asiyetishwa na jambo lolote.

Amemtaja Shariff kuwa na tabia ya hofu ya Mungu, anapenda kujichanganya na watoto wenzake, anajiamini, pia, amekuwa akipenda zaidi elimu ya Quran huku Zeana akipenda kazi za nyumbani na amekuwa na uwezo wa darasani tofauti na Zena ambaye yeye muda wote amekuwa mchangamfu, anayependa kudadasi na mwenye uwezo wa kumzoea mtu haraka.

Akizungumzia mpango wa kuongeza watoto wengine, Mkwanda amesema kwa sasa yeye na mke wake hawana mpango huo kwa sababu wamewekeza nguvu katika kuwalea kikamilifu watoto wao na kuwapa elimu iliyokuwa bora.

“Tukisema tuongeze watoto huwezi jua Mungu anaweza kutupa tena pacha na sisi bado tupo kwenye nyumba ya kupanga, hawa waliopo wanahitaji kusoma, kula na mahitaji mengine, tunasubiri wakue kwanza walau wamalize darasa la saba,” amesema Mkwanda.

Amewashukuru ndugu, majirani, madaktari wa hospitali ya rufaa Mkoa wa Morogoro, na kipekee amemshukuru aliyekuwa Mkuu wa Wilaya ya Morogoro mwaka 2017, Regina Chonjo kwa msaada aliompa hasa katika kuwapatia makopo ya maziwa watoto hao.

Post navigation

Previous: Serikali Tanga kufuatilia kesi za migogoro ya wakulima, wafugaji

Next: Nguo za kuogelea za kukodisha, kuchangia mataulo kunavyohatarisha afya

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Save my name, email, and website in this browser for the next time I comment.

Admin

Website https://thebongopost.online

Related Posts

Kilomita 59 za lami zajengwa Mji wa Serikali Mtumba

1 min read

Kilomita 59 za lami zajengwa Mji wa Serikali Mtumba

Habari za Dharura

October 30, 2026 Admin0

Kutoka wazo hadi uhalisia, safari ya miaka 53 yatimia

6 mins read

Kutoka wazo hadi uhalisia, safari ya miaka 53 yatimia

Habari za Dharura

October 30, 2026 Admin0

Dhamira ya CRDB kuifikisha Tanzania uchumi wa Dola 1 trilioni kupitia kilimo, uvuvi na mifugo

8 mins read

Dhamira ya CRDB kuifikisha Tanzania uchumi wa Dola 1 trilioni kupitia kilimo, uvuvi na mifugo

Habari za Dharura

October 30, 2026 Admin0

Kuhusu Sisi
Sera ya Faragha
Sheria na Masharti
Wasiliana Nasi

News Express © 2026. All Rights Reserved.